Sot është 1 Qershori – Dita Ndërkombëtare e Fëmijëve, e cila shënohet edhe në Kosovë me një varg aktivitetesh.
Koalicioni i OJQ-ve për Mbrojtjen e Fëmijëve, së bashku me tridhjetepesë organizatat anëtare, në kuadër të shënimit të Një Qershorit, Ditës Ndërkombëtare të Fëmijëve, organizon aktivitetin “Letra nga fëmijët e Kosovës”, në sheshin “Skënderbeu” Prishtinë, ora 11:00.
Me rastin e kësaj dite, fëmijët kanë shkruar letra në të cilat kanë shprehur ndjesitë, shqetësimet, pritshmëritë dhe kërkesat e tyre. Këto letra do të vendosen sot në hyrjet e institucioneve si: Kuvendi, Qeveria, komunat, Qendrat e Mjekësisë Familjare, Qendrat për Punë Sociale, shkollat, Policia e Kosovës, Radio Televizioni i Kosovës, etj.
Dita e Fëmijëve shënohet më 1 qershor në mbarë botën, pasi në këtë datë është mbajtur Konferenca Botërore e Mirëqenies së Fëmijëve në Gjenevë, në vitin 1925.
