Të paktën 22 persona janë vrarë gjatë natës mes të shtunës dhe dielës, përfshirë pesë fëmijë, thanë zyrtarët mjekësorë palestinezë.
Sipas Ministrisë së Shëndetësisë së Gazës, nga një sulm izraelit mbi një shkollë ku strehoheshin persona të zhvendosur në qytetin e Gazës vrau të paktën tetë persona, përfshirë tre fëmijë. Mbrojtja Civile, reaguesit e parë të lidhur me qeverinë e drejtuar nga Hamas, kishte thënë më herët se katër fëmijë ishin në mesin e të vrarëve.
Ushtria izraelite tha se kreu një sulm të saktë ndaj militantëve të Hamasit që strehoheshin atje.
Nga një sulm në një shtëpi në qytetin qendror të Deir al-Balah vonë të shtunën u vranë të paktën tetë persona, duke përfshirë tri gra dhe dy fëmijë, njoftoi Spitali i Martirëve Al-Aksa, i cili mori trupat. Gjashtë persona të tjerë u vranë në sulme të ndara të dielën, sipas spitaleve lokale.
Izraeli ka vazhduar të kryejë sulme të përditshme në Gaza për më shumë se 14 muaj pas luftës me Hamasin. Ai thotë se synon vetëm militantët, duke i akuzuar ata se fshihen mes civilëve, por bombardimet shpesh vrasin gra dhe fëmijë.
Autoritetet izraelite ndërkohë lejuan kardinalin Pierbattista Pizzaballa, udhëheqësin e Kishës Katolike në Tokën e Shenjtë, të hynte në Gaza dhe të kremtonte një meshë para Krishtlindjeve me anëtarët e komunitetit të vogël të krishterë.
Dhjetra besimtarë u mblodhën në Kishën e Familjes së Shenjtë në qytetin e Gazës, ndërsa Pizzaballa dhe klerikët e tjerë kremtonin meshën. Një pemë e Krishtlindjes ishte zbukuruar me stoli të arta dhe drita të bardha vezulluese, dhe djemtë e altarit të veshur me rroba të kuqe dhe të bardha mbanin qirinj.
“Për Krishtlindje, ne festojmë dritën dhe po pyesim veten se ku është drita. Ky është një nga vendet ku është drita”, tha Pizzaballa.
Vizita e rrallë në Gaza nga Patriarku Latin erdhi një ditë pasi Papa Françesku kishte kritikuar sërish veprimet e Izraelit në Gaza. Françesku tha të shtunën se i dërguari i tij nuk kishte mundur të hynte në territor për shkak të bombardimeve izraelite.
“Dje janë bombarduar fëmijët. Kjo është mizori, kjo nuk është luftë”, tha Françesku gjatë urimeve të tij vjetore të Krishtlindjeve në Vatikan.
Papa kohët e fundit bëri thirrje për një hetim për të përcaktuar nëse veprimet e Izraelit në Gaza përbëjnë gjenocid, një përfundim i arritur më vonë nga Amnesty International dhe Human Rights Watch.
