Zëdhënësi i Qeverisë në detyrë, Përparim Kryeziu, thotë se 27.3 milionë shpenzime për tre muaj, nuk i takojnë vetëm qeverisë në detyrë Kurti, por janë edhe të institucioneve të tjera publike.
Ai shkruan se “bëhet fjalë për shpenzimet e të gjitha institucioneve publike, ato lokale dhe qendrore: pra komunave, agjencive, qeverisë, kuvendit, presidencës etj.”.
Sipas tij “këto nuk janë shpenzime luksi, siç synohet të paraqiten, por janë shpenzime të nevojshme për operimin e institucioneve kyçe të vendit, sikurse policia dhe mbrojtja”.
“Gjithashtu, te kategoria e karburantit dhe lëndëve djegëse, përfshihen edhe lëndët djegëse për ngrohjen e shkollave”, shton ai.
Reagimi i plotë:
Dezinformatë!
Kronika e mbëmshme e Klan Kosovës qëllimshëm ia faturon të gjitha shpenzimet “Qeverisë Kurti”, përkundër faktit se aty bëhet fjalë për shpenzimet e të gjitha institucioneve publike, ato lokale dhe qendrore: pra komunave, agjencive, qeverisë, kuvendit, presidencës etj. E them qëllimshëm sepse raporti, të cilit i referohet kronika, e qartëson se aty paraqiten shpenzimet e institucioneve qendrore dhe lokale të vendit.
Për më tepër, këto nuk janë shpenzime luksi, siç synohet të paraqiten, por janë shpenzime të nevojshme për operimin e institucioneve kyçe të vendit, sikurse policia dhe mbrojtja. Gjithashtu, te kategoria e karburantit dhe lëndëve djegëse, përfshihen edhe lëndët djegëse për ngrohjen e shkollave.
Tendenca për t’i ngjyrosur këto si shpenzim luksi, por edhe për t’ia faturuar gjithë shumën vetëm qeverisë qendrore, përbën dezinformatë të qëllimshme dhe nuk i shërben informimit të saktë e të drejtë të qytetarëve. Përkundrazi, me këtë mënyrë raportimi synohet shtrembërimi i fakteve dhe krijimi i përshtypjeve të gabuara.
