Është rritur në 60 numri i personave që humbën jetën për shkak të bombardimeve intensive ajrore të Izraelit në rajonet Beqaa dhe Baalbek, në lindje të Libanit.
Sipas deklaratës së Ministrisë së Shëndetësisë të Libanit, 60 persona humbën jetën dhe 58 të tjerë u plagosën si pasojë e sulmeve të Izraelit në rajonet Beqaa dhe Baalbek, në lindje të Libanit.
Izraeli kreu sulme njëra pas tjetrës në 12 zona në Beqaa dhe Baalbek. Ndërkohë në rajon vazhdojnë punimet për heqjen e rrënojave.
Në sulmet e kryera ndaj Baalbek, më parë ishte njoftuar se humbën jetën 22 persona dhe se ishin plagosur 16 të tjerë.
Në sulmet e intensifikuara të Izraelit në Liban kanë humbur jetën 2.710 persona
Ushtria izraelite, e cila që nga 8 tetori 2023 ka vazhduar konfliktin e kontrolluar me Hezbollahun, më 23 shtator nisi qindra sulme ajrore në qytetet jugore të Libanit si dhe në rajonet Beqaa dhe Baalbek.
Sipas të dhënave të Ministrisë libaneze të Shëndetësisë, gjithsej 2.710 persona, përfshirë 104 fëmijë dhe 194 gra, janë vrarë ndërsa 12.592 të tjerë janë plagosur që nga 8 tetori 2023.
Nga ana tjetër, Sekretari i Përgjithshëm i Kombeve të Bashkuara, Antonio Guterres, shprehu shqetësim të madh lidhur me propozim-ligjet e miratuara nga parlamenti i Izraelit që ndalojnë punën e një agjencie të OKB-së, gjë që mund të ndikojë në veprimin e saj në Rripin e Gazës,.
“Jam thellësisht i shqetësuar nga miratimi i dy propozim-ligjeve nga Knesseti i Izraelit në lidhje me Agjencinë e OKB-së për Refugjatët Palestinezë në Lindjen e Afërt (UNRWA), të cilat, nëse zbatohen, mund të pengojnë UNRWA-në të vazhdojë punën e saj shumë të rëndësishme në Territorin e Pushtuar Palestinez, përfshirë Kudsin Lindor, siç është mandatuar nga Asambleja e Përgjithshme e OKB-së”, tha Guterres.
