Një zëdhënës i ish-presidentit Joe Biden konfirmoi se 82-vjeçari i është nënshtruar një operacioni Mohs për të trajtuar kancerin e lëkurës, pasi u publikuan fotografi ku ai shihej me një fashë të madhe dhe një shenjë në kokë.
Biden shfaqet me një fashë të madhe në kokë pas operacionit për trajtimin e kancerit të lëkurës
Më herët këtë vit u zbulua se Biden kishte kancer të prostatës në stadin 4.
Ish-presidenti Joe Biden kohët e fundit iu nënshtrua një operacioni për të trajtuar kancerin e lëkurës, një zbulim që erdhi pasi u shpërndanë foto dhe video shqetësuese ku 82-vjeçari shihej me një prerje të madhe në kokë.
Zëdhënësi i tij konfirmoi për Fox News se Biden kishte bërë operacion Mohs për të trajtuar kancerin e lëkurës. Ende nuk është e qartë se për çfarë lloj kanceri të lëkurës bëhej fjalë.
Një video e transmetuar në Inside Edition të enjten tregonte Biden-in duke dalë nga një kishë në Rehoboth Beach gjatë fundjavës së Labor Day, me plagën në kokë.
Në video, Biden dukej gjithashtu i dobët ndërsa përshëndeste njerëzit jashtë shërbesës të dielën. Ky paraqitje erdhi një ditë pasi ai ishte parë në mbrëmje në një dyqan akulloresh lokal, me një kapele bejsbolli që dukej se mbulonte plagën.
Në fund të gushtit, Biden u pa me një fashë të madhe mbi kokë teksa mori pjesë në ceremoninë mortore të ish-guvernatorit të Delawarit dhe kongresmenit amerikan Mike Castle, në Kishën St. Joseph at the Brandywine në Greenville.
Operacioni Mohs është një procedurë që heq shtresa të holla indi kanceroz dhe i ekzaminon ato deri sa të sigurohet se nuk kanë mbetur më qeliza të dëmshme.
Në vitin 2023, Jill Biden, ish-zonja e parë, iu nënshtrua të njëjtës procedurë për të hequr disa lezione, përfshirë një mbi syrin e djathtë.
Ky zhvillim i fundit i shtohet përballjeve të Biden-it me probleme shëndetësore. Në maj, u bë e ditur se ai ishte diagnostikuar me kancer të prostatës në stadin 4, i cili ishte përhapur në kocka.
“Kanceri na prek të gjithëve,” shkroi atëkohë ish-presidenti Biden në rrjete sociale. “Ashtu si shumë prej jush, edhe Jill dhe unë kemi mësuar se jemi më të fortë pikërisht në vendet ku jemi thyer.”
Mjekët e klasifikuan kancerin e tij si shumë agresiv, duke i dhënë një rezultat Gleason 9 dhe një Grade Group 5 – vlerësimin më të rëndë të mundshëm.
Në vitin 2023, mjekët i hoqën gjithashtu një karcinomë qelizore bazale nga kraharori. Po atë vit, ai u shpall pa kancer pas trajtimit, por që atëherë ka qenë nën kujdes të vazhdueshëm.
