Kooperativa Bujqësore “Krusha” ka njoftuar se do të mbajnë një konferencë për media për të sqaruar detajet lidhur me deklarimet e ministrit të Bujqësisë, Faton Peci, për “pretendimin se Fahrije Hoti është paditur nga kjo ministri në vitin 2017 për kthimin e rreth prej 17 mijë e 600 eurove”.
Kooperativa Bujqësore “Krusha” përmes një postimi në “Facebook” ka thënë se deklaratat e Pecit do të demantohen me fakte dhe argumente për lajmet “e rreme” të shpërndara nga ai.
“Duke marrë parasysh se kohëve të fundit, përmes rrjeteve sociale dhe faqes zyrtare të Facebook-ut të Ministrit të Bujqësisë, z. Faton Peci, po qarkullojnë deklarata dhe informacione të pabaza dhe tendencioze, me pretendimin se znj. Fahrije Hoti është paditur nga Ministria e Bujqësisë në vitin 2017 për kthimin e një shume prej 17,800 eurosh, ne ndjejmë të nevojshme të reagojmë. Gjithashtu, kemi vërejtur një përpjekje për të politizuar këtë situatë, duke e lidhur atë me ngjyrime partiake, çka është e papranueshme dhe e pavërtetë. Për këtë arsye, ftojmë të gjitha mediat e Kosovës të marrin pjesë në një konferencë shtypi, ku do të paraqiten fakte dhe argumente që demantojnë këto pretendime të rreme të shpërndara nga Peci”, thuhet në njoftim.
