Departamenti Amerikan i Shtetit (DASH) e ka dënuar sulmin që e dëmtoi kanalin e ujit të Ibër-Lepencit në Zubin Potok, e cila ka ndodhur në orët e mbrëmjes të së premtes.
Zëdhënësi i DASH-it, Matthew Miller, përmes platformës “X”, ka shkruar se do t’i mbështesin përpjekjet për t’i gjetur dhe ndëshkuar përgjegjësit, derisa bëri të ditur se do të vlerësonin të gjitha ofertat e mbështetjes për këtë përpjekje.
Miller, gjithashtu falënderoi punonjësit e emergjencës dhe të tjerët, përfshirë KFOR-in për rikthimin e furnizimit me ujë.
“Dënojmë sulmin e 29 nëntorit në ujësjellësin e Kosovës. Ne do të mbështesim përpjekjet për të gjetur dhe ndëshkuar përgjegjësit dhe do të vlerësojmë të gjitha ofertat e mbështetjes për këtë përpjekje. Falë punonjësve të emergjencës dhe të tjerëve, përfshirë KFOR-in për rivendosjen e furnizimeve thelbësore”, ka shkruar Miller.
