Atasheu i Mbrojtjes i Republikës së Kosovës në Gjermani, nënkolonel Besim Gashi, u nderua me ‘Mirënjohjen e Arritjes’ nga Ministria e Mbrojtjes e Gjermanisë.
Ky çmim ndahet për arritje dhe performancë të shkëlqyer gjatë kryerjes së detyrave në këtë mision.
Atasheu i FSK-së, që shërben në Gjermani, është nderuar me çmimin për kontribut të shkëlqyeshëm në misionin e tij nga shteti gjerman.
Si atashe i mbrojtjes për 3 vjet, Besim Gashi, përfaqëson interesat e Kosovës në fushën e mbrojtjes në Gjermani.
“Ndjehem jashtëzakonisht mirë dhe krenar kur shohim vazhdimisht të arriturat e vendit tonë ndërtimin e kapaciteteve shtetërore, ndërtimin e vendit. Të jesh atashe i Mbrojtjes në Republikën Federale të Gjermanisë është një privilegj i madh, sepse Gjermania është shtet i zhvilluar. Qasja e tyre ndaj Kosovës është kontribuese në shtetndërtimin e Kosovës”, tha ai.
Derisa ndihet krenar me ushtrinë e Kosovës, në kazermën “Adem Jashari” në Prishtinë, atasheu Besim Gashi rrëfen për sakrificën dhe mirënjohjen që ka marrë nga Republika Federale e Gjermanisë.
“Të jesh në profesionin e ushtarakut është sfiduese, një pjesë të madhe të kohës jemi larg familjeve, por kemi përkushtim të madh për realizimin e misionit tonë, jemi të vetëdijshëm për misionin tonë dhe të tashmen për realizmin e detyrave tona. Quhet Mirënjohja e Arritjes dhe është çmimi më i lartë i autoritetit të Bundesferit që jepet nga Bundesferi për oficerët ndërkombëtarë dhe vlerësohet efikasiteti në realizimin e misionit me të cilin ngarkohet atasheu”, tha Gashi, raporton RTK.
Atasheu Besim Gashi është një nga oficerët e FSK-së, i cili merr mirënjohje për kontribut nga një shtet tjetër.
