Dronët ukrainas kryen një sulm gjatë natës në një fabrikë nafte në rajonin Oryol të Rusisë që është një burim vendimtar i furnizimeve me karburant për trupat ruse, tha ushtria e Ukrainës të shtunën.
Dronët goditën stacionin e kontrollit të prodhimit të “Steel Horse”, i cili shtrihet rreth 170 km nga kufiri me Ukrainën, thuhet në një deklaratë ushtarake.
Më herët, guvernatori rajonal rus Andrei Klychko tha në aplikacionin e mesazheve Telegram se dronët ukrainas kishin goditur një objekt të infrastrukturës së karburantit, duke shkaktuar një zjarr, por jo viktima. Ai tha se 11 dronë ishin rrëzuar mbi rajon.
Rajoni Oryol është fqinj me rajonin Kursk të Rusisë, ku trupat ukrainase kontrollojnë disa vendbanime pas inkursionit të Kievit në territorin rus në gusht.
Ukraina ka rritur përdorimin e dronëve këtë vit për të sulmuar objektet e naftës ruse, të cilat i konsideron si objektiva legjitime ushtarake që po ndihmojnë trupat ruse në pushtimin e tyre gati 34-mujor. Moska i quan sulmet “akte terroriste”.
