Drama në Serbi: Vuçiç rikthen shërbimin ushtarak të detyrueshëm pas 23 vitesh
Presidenti i Serbisë, Aleksandar Vuçiç, ka njoftuar rikthimin e shërbimit ushtarak të detyrueshëm, duke e rikthyer Serbinë në një praktikë të braktisur që nga viti 2001. Ky vendim vjen ndërsa vendi ka pasur vetëm një ushtri profesionale në 23 vitet e fundit.
Në një ceremoni promovimi të kadetëve në Akademinë Ushtarake të Serbisë, Vuçiç bëri të ditur se shërbimi i detyrueshëm do të zgjasë 75 ditë. “Shpresoj që të gjithë ta kuptoni se sa shumë kemi nevojë për një ushtri të fortë, sa shumë kemi nevojë të blejmë dhe prodhojmë më shumë armë,” tha ai. Ai shtoi gjithashtu se ky vendim nuk synon sulm ndaj ndonjë vendi tjetër, por për të frikësuar ata që kërcënojnë Serbinë “me një egërsi të pamëshirshme çdo ditë.”
Edhe pse Vuçiç nuk përmendi qartë se cilët janë ata që po kërcënojnë Serbinë, ai ka theksuar vazhdimisht nevojën për forcimin e kapaciteteve ushtarake. Për të miratuar rikthimin e shërbimit të detyrueshëm, propozimi duhet të marrë miratimin e qeverisë dhe parlamentit, ku partia e Vuçiç ka një shumicë të konsiderueshme.
Presidenti serb kishte paralajmëruar kohët e fundit se po shqyrtohej shërbimi ushtarak me një kohëzgjatje prej 60 plus 15 ditësh, i cili do të ishte i detyrueshëm për burrat, ndërsa gratë do të mund të shërbenin vullnetarisht.
Ky vendim i fundit ka ngritur shqetësime në mesin e grupeve të të drejtave të njeriut, të cilat shpesh kanë kritikuar Vuçiç për prirjet e tij autoritare që nga ardhja në pushtet në vitin 2017.
by: Storm-rks + materialet e perdorura nga mediat afer ngjarjes
