Presidenti i SHBA Joe Biden dhe presidenti ukrainas Volodymyr Zelenskiy diskutuan të premten mbështetjen e Uashingtonit për Ukrainën, sanksionet e reja të SHBA kundër Rusisë dhe rritjen e mbrojtjes ajrore të Ukrainës.
Zelenskiy, në një postim në rrjetet sociale, falënderoi Biden për mbështetjen e Uashingtonit në luftën gati trevjeçare të Ukrainës me Rusinë dhe për “rolin jetësor që Shtetet e Bashkuara kanë luajtur në bashkimin e komunitetit ndërkombëtar”.
Zelenskiy tha se presidentët diskutuan gjithashtu sanksionet e reja të SHBA kundër sektorit energjetik të Rusisë, “që ndihmon (presidentin rus Vladimir) Putin të financojë luftën”.
“Ai duhet të ndiejë koston e luftës së tij duke parë se ajo ndikon drejtpërdrejt në xhepat e tij”, shkroi ai.
Zelenskiy tha se ai dhe Biden diskutuan nevojën për të vazhduar ndërtimin e mbrojtjes ajrore të Ukrainës “për të mbrojtur jetët në qytetet dhe fshatrat e Ukrainës nga terrori rus – sulmet e përditshme me raketa dhe dron”.
Raketat Patriot të furnizuara nga SHBA, tha ai, “kanë provuar efektivitetin e tyre dhe ne duhet të vazhdojmë ta përmirësojmë këtë kapacitet”.
Gjatë ditës së premte administrata e presidentit amerikan Joe Biden vendosi paketën e saj më të gjerë të sanksioneve deri më tani që synojnë të ardhurat e naftës dhe gazit të Rusisë të premten, në një përpjekje për t’i dhënë Kievit dhe ekipit të ardhshëm të Donald Trump levave për të arritur një marrëveshje për paqen në Ukrainë.
Masa synon të shkurtojë të ardhurat e Rusisë për vazhdimin e luftës në Ukrainë që ka vrarë më shumë se 12,300 civilë dhe ka bërë qytete në gërmadha që nga pushtimi i Moskës në shkurt 2022.
Presidenti ukrainas Volodymyr Zelenskiy tha në një postim në X se masat e shpallura të premten do t’i japin një goditje të rëndësishme Moskës. “Sa më pak të ardhura të fitojë Rusia nga nafta, aq më shpejt do të rivendoset paqja”, shtoi Zelenskiy.
Daleep Singh, një këshilltar i lartë i Shtëpisë së Bardhë për ekonominë dhe sigurinë kombëtare, tha në një deklaratë se masat ishin “sanksionet më të rëndësishme deri më tani ndaj sektorit energjetik të Rusisë, deri tani burimi më i madh i të ardhurave për luftën e (Presidentit Vladimir) Putin”.
Thesari i SHBA-së vendosi sanksione ndaj Gazprom Neft dhe Surgutneftegas, të cilët eksplorojnë, prodhojnë dhe shesin naftë, si dhe 183 anije që kanë transportuar naftë ruse, shumë prej të cilave janë në të ashtuquajturën flotë hije të cisternave të vjetruara të operuara nga kompani joperëndimore.
