Fushata zgjedhore për zgjedhjet parlamentare në Kosovë nis sot zyrtarisht.
Për gati një muaj, subjektet politike dhe kandidatët pritet të prezantojnë platformat e tyre për të bindur qytetarët për votën në zgjedhjet e 9 shkurtit.
Gjatë kësaj periudhe, janë planifikuar aktivitete të shumta, përfshirë tubime publike e takime me qytetarët në të gjithë vendin.
Komisioni Qendror i Zgjedhjeve (KQZ) ka certifikuar gjithsej 28 subjekte politike për pjesëmarrje në Zgjedhjet për Kuvendin e Kosovës, të cilat do të mbahen më 9 shkurt 2025. Këto subjekte përbëhen nga 20 parti politike, 5 koalicione, 2 iniciativa qytetare dhe 1 kandidat i pavarur.
Në total, janë certifikuar 1,280 kandidatë për deputetë nga këto subjekte politike.
Organizatat joqeveritare kanë bërë thirrje për një fushatë të qetë dhe për respektimin e rregullave zgjedhore nga të gjitha palët.
Ndryshe, Policia e Kosovës ka njoftuar se do të marrë masa për të siguruar mbarëvajtjen e aktiviteteve dhe për të shmangur incidentet.
