Storm/Gjermani: Koalicioni qeverisës në Gjermani po përjeton një krizë të thellë që mund të jetë e pamundur të tejkalohet, ndërsa vendi po hyn në atë që disa e kanë quajtur “Vjeshta e Vendimeve.” Pavarësisht një fitoreje të ngushtë në zgjedhjet e Brandenburg, kancelari Olaf Scholz përballet me sfida të mëdha brenda koalicionit të tij të përbërë nga tre parti — SPD, Të Gjelbrit dhe FDP.
Pas zgjedhjeve, ku SPD fitoi kundër partisë së djathtë ekstreme AfD, të Gjelbrit dhe FDP u përballën me humbje të mëdha, duke rritur tensionet brenda koalicionit. Christian Lindner, lideri i FDP-së dhe ministri i Financave, paralajmëroi se e ardhmja e koalicionit varet nga vendimet dhe zgjidhjet që do të merren gjatë kësaj periudhe kritike nga koalicioni i të tre partive. Ai theksoi nevojën për zgjidhje të çështjeve kyçe si migracioni, rritja ekonomike dhe buxheti. Një problem madhor është edhe industria automobilistike gjermane, e cila përballet me kërcënimin e një lufte tregtare me Kinën për shkak të tarifave të BE-së për makinat elektrike të prodhuara në Kinë. Lindner paralajmëroi se një luftë tregtare do të dëmtonte ndjeshëm ekonominë e Gjermanisë, e cila është një nga prodhuesit më të mëdhnjë në industrinë automobilistike.
Ndërkohë, “konflikti” dhe mungesa e bashkëpunimit midis partnerëve të koalicionit po bën gjithnjë e më të vështirë zgjidhjen e këtyre sfidave. Disa politikanë të FDP-së kanë dhënë shënja madje që koalicioni mund të dështojë edhe deri në Krishtlindje, duke hapur rrugën për zgjedhje të parakohshme.
Kancelari Scholz është i vetëdijshëm për vështirësitë, por ai vazhdon të shmangë përgjigje të drejtpërdrejta për të ardhmen e koalicionit, duke theksuar vetëm nevojën për të përballuar sfidat me të cilat përballet qeveria në këto kohë të vështira.
