Storm/Izrael: Izraeli po përshkallëzon sulmet e tij në Liban, deklaroi të hënën ministri izraelit i mbrojtjes, Yoav Gallant, teksa ushtria izraelite kreu një valë të re sulmesh ajrore kundër objektivave të Hezbollah-ut. “Ne po intensifikojmë sulmet tona në Liban; kjo seri veprimesh do të vazhdojë derisa të arrijmë qëllimet tona, duke rikthyer banorët e veriut në shtëpitë e tyre të sigurt,” tha Gallant, sipas burimeve lokale.
Forcat e Mbrojtjes së Izraelit (IDF) njoftuan se të hënën kanë vendosur dhjetëra avionë luftarakë dhe kanë goditur 150 objektiva në Liban. Kjo raund i ri sulmesh erdhi disa orë pasi Hezbollah-u, një grup militant dhe parti politike e mbështetur nga Irani me bazë në Liban, hodhi dhjetëra raketa drejt një baze ushtarake izraelite në veri të vendit.
Përplasjet ndërmjet Izraelit dhe Hezbollah-ut janë bërë thuajse të përditshme që nga sulmi i 7 tetorit nga grupi militant palestinez Hamas në Izrael, por konflikti u përshkallëzua javën e kaluar kur pajisjet e komunikimit të Hezbollah-ut u hodhën në erë në mënyrë të telekomanduar, duke shkaktuar dhjetëra të vrarë dhe mijëra të plagosur.
Zyrtarët e Hezbollah-ut e akuzuan Izraelin për sulmin tejet të sofistikuar, por Izraeli ende nuk e ka marrë përgjegjësinë për të. Ndërkohë, Shtetet e Bashkuara po e minimizojnë publikisht përshkallëzimin e tensioneve, ndërsa frika për një luftë rajonale më të gjerë po rritet.
Sekretari i Përgjithshëm i Kombeve të Bashkuara, António Guterres, paralajmëroi të dielën se Libani mund të kthehet në një “Gaza tjetër” nëse përkeqësohen armiqësitë ndërmjet Izraelit dhe Hezbollah-ut.
