Policia e Kosovës ka gjetur dhe larguar kamerën e tretë të maskuar në veri, e cila po monitoronte pjesën publike, magjistralen Mitrovicë-Leposaviq.
Këtë e ka konfirmuar për media zëvendësdrejtori i Policisë së Kosovës për rajonin e veriut, Veton Elshani.
Ai ka treguar se pas konsultimit me prokurorinë, sot është hapur rasti “incizim i paautorizuar”, por se ende nuk ka ndonjë të arrestuar.
“Dje në Leposaviq, policia ka larguar një kamerë e cila e monitoronte pjesën publike, respektivisht magjistralen Mitrovicë-Leposaviq. Pas konsultimit me prokurorinë, sot është hapur rasti “incizim i paautorizuar. Nuk ka persona të arrestuar, ndërsa kjo është kamera e tretë e maskuar e larguar që monitoronte vendet publike. Dy të tjerat kanë qenë në Mitrovicën e Veriut, vitin e kaluar”, tha Elshani.
