Presidenti Donald Trump kërcënoi të mërkurën se do të vendosë “nivele të larta” sanksionesh ndaj Rusisë dhe tarifa për importet nga atje nëse vendi nuk arrin një zgjidhje për t’i dhënë fund luftës së tij gati trevjeçare kundër Ukrainës.
Paralajmërimi i Trump, i bërë në një postim në mediat sociale në ditën e tij të tretë si president, thirri me emër presidentin rus Vladimir Putin.
“Nëse nuk bëjmë një “marrëveshje” dhe së shpejti, nuk kam zgjidhje tjetër veçse të vendos nivele të larta taksash, tarifash dhe sanksionesh për çdo gjë që u shet nga Rusia Shteteve të Bashkuara dhe vendeve të tjera pjesëmarrëse”, shkroi Trump në Truth Social.
“Ta mbarojmë këtë luftë, e cila nuk do të kishte filluar kurrë po të isha President! Ne mund ta bëjmë atë në mënyrën e lehtë, ose në mënyrën e vështirë – dhe mënyra e lehtë është gjithmonë më e mirë”, shkroi Trump.
″Është koha për të “BËRË NJË MARREVESHJE”. NUK DUHET TË HUMBEN MË JETË!!!”
Trump kishte thënë vazhdimisht se ai mund t’i jepte fund luftës në Ukrainë brenda një dite nëse zgjidhej për një mandat të dytë, jo të njëpasnjëshëm në Shtëpinë e Bardhë. Lufta filloi në shkurt 2022 me një pushtim të Rusisë.
