Më shumë se 100 dronë ukrainas u drejtuan në objektiva në 11 rajone ruse, duke goditur rafinerinë e naftës në Ryazan dhe një termocentral ngrohjeje, që përben një nga sulmet më të mëdha të Ukrainës në Rusi.
“Kjo rafineri është një nga më të mëdhatë në Rusi, mund të përpunojë 17 milionë tonë naftë në vit. Aty digjen të paktën tri tanke. Për më tepër, një zjarr shpërtheu dhe përfshiu punishten ku ndodhet njësia e hidrotrajtimit të karburantit me naftë dhe vajguri të aviacionit”, tha një zyrtar i shërbimit të sigurisë SBU të Ukrainës për POLITICO, duke folur me kushte anonimiteti.
Rafineria është rreth 500 kilometra nga kufiri me Ukrainën.
Në Ryazan, banorët postuan video në mediat sociale që tregonin më shumë se 50 shpërthime, përfshirë në një stacion pompimi nafte dhe termocentralin Ryazan, shtuan zyrtarët e SBU.
“Është efekti i ‘sanksioneve tona me dron’ kundër ndërmarrjeve të kompleksit ushtarak-industrial rus dhe sektorit të naftës në pjesën e pasme ruse. Ne do të vazhdojmë të dobësojmë aftësitë ushtarake ruse”, tha zyrtari.
Ministria ruse e mbrojtjes pretendoi se ka kapur dhe shkatërruar 121 dronë në 11 rajone të Rusisë. Njëri u qëllua mbi Moskë. Banorët dhe mediat raportuan gjithashtu shpërthime në rajonin Bryansk të Rusisë, ku thuhet se u rrëzuan 37 dronë.
“Uzina Kremniy në Bryansk po pezullon funksionimin pas një sërë goditjesh mbrëmë. Është një nga dy prodhuesit kryesorë të mikroelektronikës për raketat dhe mbrojtjen ajrore në Rusi”, tha në një deklaratë koloneli Andriy Kovaneko, kreu i Qendrës së Ukrainës për Kundër Dezinformimit .
Ai tha se ishte sulmi i tretë në një fabrikë që prodhon sisteme të luftës elektronike dhe mikroelektronikë për raketat balistike të Rusisë Iskander dhe shumë më tepër.
Ka pasur një rritje në aftësinë e Ukrainës për të goditur objektivat brenda Rusisë dhe një nga efektet duket të jetë një reduktim i përdorimit të artilerisë nga ushtria ruse në fushën e betejës.
“Për disa muaj, normat e konsumit të municioneve artilerie në ushtrinë ruse janë ulur pothuajse përgjysmë. Nëse më parë kjo shifër arrinte në 40,000 në ditë, tani është shumë më pak”, i tha televizionit ukrainas komandanti i përgjithshëm i ushtrisë ukrainase, gjenerali Oleksandr Syrskyi.
