Presidentja e Kosovës, Vjosa Osmani, është takuar me kryetarin e Komisionit për Punë të Jashtme në Dhomën e Përfaqësuesve të SHBA-së, Brian Mast.
Në një postim në Facebook, Osmani ka bërë të ditur se në takim kanë diskutuar për lidhjen historike të Kosovës me Shtetet e Bashkuara.
“Diskutuam për lidhjen historike të Kosovës me Shtetet e Bashkuara – një aleancë e ndërtuar mbi vlera të përbashkëta dhe përkushtim për paqe e siguri”, ka shkruar Osmani në Facebook.
E para e shtetit tutje theksoi se me administratën e presidentit Trump synojnë thellimin e bashkëpunimit në fusha të ndryshme.
“Me administratën e Presidentit Trump, synojmë thellimin e bashkëpunimit në fusha të ndryshme, përfshirë mbrojtjen, investimet strategjike dhe vazhdimin e punës së përbashkët për forcimin e pozitës ndërkombëtare të Kosovës.Mbështetja amerikane ka qenë dhe mbetet jetike për shtetin tonë!”, ka theksuar Osmani.
