Haradinaj: Kapja e institucioneve nga Qeveria Kurti, goditje ndaj demokracisë
storm•/Zgjedhjet2025: Kryetari i AAK-së, Ramush Haradinaj, ka reaguar ashpër ndaj menaxhimit të procesit zgjedhor nga Komisioni Qendror i Zgjedhjeve (KQZ), duke e cilësuar si një dështim të plotë dhe një skemë të organizuar të manipulimit të votave.
Sipas Haradinajt, për herë të parë në historinë e Kosovës së pavarur, rezultatet preliminare të zgjedhjeve nuk dihen as pas 24 orëve, duke ngritur dyshime të forta mbi integritetin e procesit. Ai fajëson Qeverinë Kurti për kapjen e KQZ-së, përmes zëvendësimit të kuadrove profesionale me militantë partiakë dhe dhënies së tenderëve të dyshimtë për kompanitë teknologjike që menaxhojnë sistemin zgjedhor.
“Manipulim i organizuar për të ndryshuar vullnetin e qytetarëve”
Haradinaj thekson se ka raportime nga terreni që dëshmojnë për një skemë të organizuar të manipulimit, ku përmes një “sistemi të dështuar teknik”, po tentohet të ndryshohet rezultati i zgjedhjeve.
“Kjo është goditje e rëndë ndaj demokracisë dhe vlerave për të cilat kemi luftuar. Nuk do të lejojmë që vota e qytetarëve të tjetërsohet përmes skemave manipulative,” deklaron ai.
Thirrje për veprim institucional
Lideri i AAK-së ka kërkuar që të përdoren të gjitha mekanizmat institucionalë dhe ligjorë për të mbrojtur integritetin e procesit zgjedhor dhe vullnetin e qytetarëve.
Ai i ka bërë thirrje institucioneve të drejtësisë që të hetojnë urgjentisht manipulimet dhe të ndalojnë degradimin e mëtejshëm të procesit zgjedhor.
“Demokracia nuk mund të jetë viktimë e manipulimeve politike. Duhet veprim i menjëhershëm për të ruajtur legjitimitetin e zgjedhjeve,” përfundon Haradinaj.
