Kryebashkiaku i Tiranës, Erion Veliaj, ka apeluar vendimin e dhënë në 9 shkurt nga gjyqtari Erion Bani, vendim që çoi në arrestimin e tij më 10 shkurt.
Kërkesa për apelin është dorëzuar në Sekretarinë e Gjykatës së Posaçme më 14 shkurt dhe pritet të shqyrtohet më 17 shkurt.
Mbrojtja e Veliajt ka njoftuar se po pret zbardhjen e vendimit të 12 shkurtit, kur masat e sigurimit për kryebashkiakun u rikonfirmuan, dhe më pas do të kërkojnë një ankim të ri.
Erion Veliaj mbahet aktualisht në paraburgim në Durrës, pas kërkesës së SPAK për akuzat e korrupsionit pasiv dhe pastrimit të parave.
Hetimi ka zbuluar se Veliaj ka dhënë leje ndërtimi për biznesmenët, të cilët i kanë paguar ato përmes OJF-ve të bashkëshortes së tij, Ajola Xoxa, duke financuar aktivitete artistike dhe konsulencë ligjore.
Në seancën e 12 shkurtit, Gjykata e Posaçme rikonfirmoi masën “arrest në burg” për Veliajn dhe biznesmenin Elman Abule, ndërsa disa të tjerë morën masa të tjera, përfshirë detyrim paraqitje.
Për bashkëshorten e Veliajt, Ajola Xoxa, gjyqtari vendosi të zbusë masën, duke e kaluar nga arresti shtëpiak në detyrim paraqitje, ndryshe nga kërkesa e prokurorëve për vazhdimin e arrestit shtëpiak.
Deri tani, masa detyrim paraqitje për biznesmenin Sokol Kryeziu nuk është ekzekutuar, pasi ai është jashtë vendit.
