Sovraniteti gjuhësor rikonfirmohet në Zveçan: Tabela në gjuhën qhqipe vendosen pas 25 vitesh thotë Peci, i pari i Zveçanit
Storm/Veriu: Kryetari i Komunës së Zveçanit, Ilir Peci, ka bërë të ditur vendosjen e tabelave në gjuhën shqipe dhe gjuhë të tjera në këtë komunë, duke përfshirë mesazhe si “Mirë se vini” dhe “Rruga e mbarë”. Pas 25 vitesh, ky hap përfaqëson një moment të rëndësishëm për komunën e Zveçanit, ku për herë të parë janë vendosur tabela informuese në shqip.
“Mirë se vini në Zveçan! Pas 25 vitesh, kemi arritur të vendosim tabelat informuese në shqip dhe në gjuhë të tjera në komunën tonë,” deklaroi Peci, duke nënvizuar rëndësinë e tyre si për banorët, ashtu edhe për vizitorët e shumtë që e frekuentojnë këtë komunë.
Ai theksoi se këto tabela jo vetëm që ofrojnë ndihmë dhe orientim, por edhe reflektojnë vlerat e diversitetit dhe bashkëjetesës që janë të rrënjosura thellë në këtë zonë.
“Ky është një hap që tregon angazhimin tonë për promovimin e gjuhëve zyrtare në hapësirat publike,” tha kryetari i komunës, duke nënvizuar rëndësinë e respektimit të gjuhëve zyrtare në Republikën e Kosovës.
