Vajza katërvjeçare zbulon fjalët tronditëse të babait vrasës pasi ekzekutoi nënën, gjyshin dhe fqinjën
storm•/Kronikë e Zezë: Një vajzë katërvjeçare, e cila dëshmoi teksa babai i saj qëlloi për vdekje nënën, gjyshin dhe një fqinj, i tregoi policisë në detaje të tmerrshme ngjarjet që ndodhën, thanë autoritetet në Florida.
Seraphine, vajza e 43-vjeçarit Nathan Gingles, tha se ishte ulur në divanin e dhomës së ndenjjes në shtëpinë e saj në Tamarac të dielën kur babai i saj hyri me forcë nga dera e pasme, sipas një deklarate arrestimi të siguruar nga Miami Herald.
Nathan më pas doli në oborrin e shtëpisë me një armë të gjatë të zezë dhe tha “mirupafshim” përpara se të vriste David Ponzer, 64 vjeç, tha vajza.
Ponzer, gjyshi nga ana e nënës së vajzës, ishte jashtë duke pirë kafen e mëngjesit kur u qëllua për vdekje rreth orës 6:30 të mëngjesit, sipas raportit të arrestimit.
Vajza më pas tregoi se e pa babanë e saj duke ndjekur të ëmën, Mary Catherine Gingles, 34 vjeç, deri në rrugë, ku ata filluan të përlesheshin përtokë.
Ajo u tha hetuesve se nëna e saj bërtiste për ndihmë dhe po trokitte me forcë në dyert e fqinjëve, derisa arriti të futej në shtëpinë e 36-vjeçarit Andrew Ferrin.
Policia tha se kamerat e sigurisë treguan Nathan-in duke hyrë në shtëpinë e Ferrin-it, e cila ndodhej përballë shtëpisë së tij.
Seraphine tha se sapo babai i saj hyri në shtëpinë e Ferrin-it, ai qëlloi nënën e saj “njëqind herë”, edhe pse policia konfirmoi se ishin shkrepur 10 plumba.
Mary dhe Ferrin u gjetën të vdekur në një dhomë gjumi. Trupi i saj ishte në dysheme, pranë dritares, ndërsa trupi i fqinjit ishte në shtrat dhe mbuluar me një batanije, sipas policisë.
Gjithashtu, u zbulua se Mary kishte plagë të rënda në fytyrë dhe dy shenja nga një armë elektrike (taser) nën shpatullën e djathtë.
Sipas dokumenteve të arrestimit, vajza katërvjeçare e përshkroi vrasjet si momentin kur e ëma dhe gjyshi i saj u “mposhtën”. Ajo shtoi se dëshironte që e ëma të “mposhte” babanë e saj, por “babai fitoi”.
Rrëmbimi i vajzës nga babai
Seraphine më pas u rrëmbye nga babai i saj, i cili i tha se nuk do ta shihte më kurrë nënën apo gjyshin e saj dhe se po shkonin për të vizituar familjen në Teksas.
Po atë ditë, u lëshua një alarm Amber Alert për vajzën, çka çoi në arrestimin e Nathan-it nga oficerët e sherifit të Broward County në një parking të Walmart në North Lauderdale.
Sipas dokumenteve gjyqësore, Nathan ishte i ndaluar të kontaktonte me gruan e tij, Mary, që nga fillimi i shkurtit 2024, pasi ajo kishte marrë një urdhër mbrojtjeje për dhunë në familje kundër tij.
Procedurat e divorcit nisën më vonë atë muaj dhe ishin ende në proces në kohën kur ndodhi vrasja e trefishtë.
Nathan, i cili tani ndodhet në paraburgim pa mundësi lirimi me kusht në burgun kryesor të Broward County, përballet me tre akuza për vrasje të shkallës së parë me paramendim. Vetëm për këto tre akuza, ai mund të dënohet me vdekje nëse shpallet fajtor.
Ai gjithashtu është akuzuar për shtatë krime të tjera, duke përfshirë rrëmbimin, shkeljen e një urdhri mbrojtjeje dhe abuzimin me fëmijën.
Hetimi për dështimin e policisë
Sherifi i Broward County, Gregory Tony, tha se oficerët e tij dështuan në parandalimin e vrasjeve dhe paralajmëroi se disa do të humbnin vendin e punës.
“Këto vdekje ndodhën në mandatin tim,” tha Tony. “Do të ketë persona që do të humbin punën për këtë.”
Ai njoftoi pezullimin e shtatë oficerëve, pasi hetimi i brendshëm zbuloi gabime serioze në trajtimin e situatës nga ana e policisë.
Autoritetet thanë se oficerët kishin dështuar të ndërhynin në rastet e dhunës në familje midis Gingles dhe gruas së tij në tetor dhe dhjetor.
“Kjo ishte thjesht një performancë e dështuar, neglizhencë dhe njerëz që nuk e bënë punën e tyre siç duhet,” tha Tony.
“Kishim mjaftueshëm prova për të kërkuar një urdhër arresti dhe për ta larguar atë nga rruga, por kjo nuk ndodhi.
“Po them qartë: kishim një mundësi për ta shpëtuar jetën e të dashurve tuaj dhe dështuam,” përfundoi ai.
Historia e një martese të dhunshme
Sipas dokumenteve të gjykatës, Nathan dhe Mary u takuan në vitin 2016 dhe u martuan dy vite më vonë. Ata më pas u zhvendosën në Gjermani, ku lindi vajza e tyre, Seraphine, në gusht 2020.
Mary kishte raportuar se Nathan ishte një burrë i dhunshëm dhe abuziv, i cili e kishte kërcënuar disa herë me vdekje.
Në një rast, ajo tha se ai kishte qëndruar zgjuar gjithë natën duke thithur Adderall dhe në mëngjes këndonte një këngë të trilluar për mënyrën se si do ta vriste atë dhe do t’ia hidhte pa u zbuluar kurrë.
“Nëse përpiqesh të largohesh prej meje, do të të vras,” i kishte thënë ai disa herë.
Urdhri i saj i parë mbrojtës përfundoi në korrik 2024, por ajo arriti të marrë një tjetër në dhjetor, i cili ishte ende në fuqi në momentin kur ajo u vra.
Në kërkesën e saj të dytë për mbrojtje, ajo deklaroi:
“Sjelljet përndjekëse të Nathan-it janë shtuar kohët e fundit dhe mendoj se ai po përgatitet të më vrasë ndërsa ka ende akses në pronën ku unë jetoj.”
Në tetor, ajo raportoi në policinë e Broward-it se kishte gjetur një pajisje gjurmuese në makinën e saj, e cila përputhej me një që Nathan kishte blerë disa javë më parë.
Në dhjetor, ajo raportoi se kishte gjetur atë që i dukej si një “kit për vrasje” në garazhin e saj.
“Mendoj se ai do të përpiqet të më vrasë së shpejti,” kishte shkruar Mary në dokumentet gjyqësore të dhjetorit.
Megjithëse urdhri i mbrojtjes u zgjat deri më 19 mars, ai nuk e ndaloi sulmin fatal.
