Pozita e Volodymyr Zelensky-t ka kaluar nga e vështirë në të dëshpëruar brenda natës, pasi Donald Trump tronditi Ukrainën dhe aleatët e saj evropianë duke pezulluar të gjithë ndihmën ushtarake të SHBA-ve me efekt të menjëhershëm.
storm•/SHBA-Ukraine: Marrëdhëniet mes dy burrave, tashmë të këqija pas përplasjes së tyre në Zyrën Ovale, mund të jenë tani të pariparueshme – diçka që mund të jetë pikërisht ajo që Trump dhe JD Vance, nënpresidenti i tij, synojnë.
Të hënën, Zelensky tha se një marrëveshje paqeje ishte “shumë, shumë larg”, gjë që e nxiti Trumpin të deklaronte se presidenti ukrainas “nuk do të jetë aty për shumë gjatë” nëse nuk e përfundon luftën shpejt. Disa orë më vonë, nga Washingtoni erdhi njoftimi i papritur se ishte pezulluar mbështetja ushtarake për Kievin, e cila përbën 43% të ndihmës ndërkombëtare. Trump ka urdhëruar gjithashtu zyrtarët e tij të Thesarit të përgatisin një listë sanksionesh që mund të lehtësohen ndaj Rusisë.
Nuk duhet të jesh strateg ushtarak për të kuptuar se Vladimir Putini do ta shohë këtë si një mundësi për të avancuar më thellë në një Ukrainë të dobësuar. Si Putini ashtu edhe Trumpi mund të shpresojnë që Zelensky të detyrohet të nënshkruajë një marrëveshje paqeje për të ndaluar këtë skenar, ose ndoshta të rrëzohet nga brenda. Elon Musk madje ka filluar të flasë për mundësinë që Zelensky të marrë “amnisti në një vend neutral” nëse arratiset.
Liderët evropianë pritet të mbajnë një tjetër samit në Bruksel të enjten, ku do të duhet të vendosin nëse mund ta mbajnë Ukrainën në luftë duke dyfishuar ndihmën që ofrojnë.
Por nuk është aq e thjeshtë sa të shpenzosh më shumë para. Urdhri i Trumpit zbatohet për të gjithë pajisjet ushtarake amerikane që aktualisht janë në tranzit për në Ukrainë ose të grumbulluara në kufirin polak, të cilat nuk mund të zëvendësohen brenda natës. SHBA furnizon gjithashtu sistemet e mbrojtjes ajrore Patriot dhe NASAMS, të cilat mbrojnë Ukrainën nga sulmet me raketa dhe dronë. Për më tepër, ka sinjale nga Uashingtoni se mund të pezullohet edhe ndarja e inteligjencës.
Gjatë luftës, kemi parë se sa vendimtare ka qenë pajisja ushtarake e ofruar nga SHBA për Ukrainën – një sulm i pretenduar mbi një bazë ushtarake ruse me një bombë të drejtuar satelitorisht JDAM është vetëm një nga shembujt e shumtë.
Zhgënjim dhe pasiguri në Evropë
Gazetari i The Telegraph, Memphis Barker, raporton se mbrëmë një avion Boeing 747 i SHBA u ul në qytetin kufitar polak Rzeszow – porta kryesore drejt fushëbetejës – që mund të jetë i fundit. Ai thekson se mungesa e raketave të drejtuara me GPS, automjeteve luftarake Bradley dhe pajisjeve të tjera jo vetëm që do të ndikojë në aftësinë ushtarake të Ukrainës, por edhe në moralin e ushtarëve ukrainas, të cilët deri më tani kanë besuar se mbështetja me armë të teknologjisë së lartë u jep atyre një avantazh kundër ushtrisë ruse numerikisht më të madhe.
Ndërkohë, Vance po bën gjithçka që mundet për të helmuar atmosferën përpara samitit të së enjtes – që tani duket shumë larg – duke pretenduar se liderët evropianë publikisht mbështesin Zelenskyn, por privatisht kërkojnë që ai ta përfundojë luftën.
“Ndonjëherë do të shihni liderë evropianë që publikisht fryjnë gjoksin dhe thonë: ‘Jemi me Presidentin Zelensky për 10 vitet e ardhshme’,” tha Vance për Fox News. “Por pastaj në privat do të marrin telefonin dhe do të thonë: ‘Kjo nuk mund të vazhdojë përgjithmonë. Ai duhet të vijë në tryezën e negociatave’.”
Vonë të hënën në mbrëmje, plani ynë ishte që ky buletin të fokusohej te përçarjet brenda “koalicionit të gatshëm” të Sir Keir Starmer lidhur me një plan të mundshëm armëpushimi, pasi Italia tha se ishte “i parakohshëm”. Në një ditë tjetër, lajmi se Australia mund të jetë e gatshme të dërgojë ushtarë në Ukrainë si pjesë e një force paqeruajtëse do të kishte qenë kryelajm.
Fakti që ky nuk është lajmi kryesor tregon aftësinë e Trumpit për ta përmbysur gjithçka me një firmë. Përveç lëvizjeve të tij ndaj Ukrainës, Trump nisi gjithashtu një luftë tregtare ndërkombëtare mbrëmë duke vendosur tarifa mbi Kinën, Kanadanë dhe Meksikën. Kanadaja dhe Kina njoftuan masa hakmarrëse që prekin qindra miliarda paund mallrash, duke shkaktuar shqetësime në tregje.
Trump do t’i drejtohet Kongresit sonte. Për çfarë do të flasim të gjithë nesër në këtë kohë, mbetet për t’u parë.
