Zv/kryeministrja dhe ministrja e Punëve të Jashtme e Kosovës, Donika Gërvalla, ka theksuar rolin e rëndësishëm të Forcës së Sigurisë së Kosovës (FSK) në mbrojtjen e vendit.
Ajo ka shkruar se FSK-ja është “mburoja e shtetit” dhe “drita që ndriçon rrugën drejt paqes dhe sigurisë.”
Ajo ka treguar se ka marrë pjesë në ceremoninë e Rreshtimit të Kuadrateve Ushtarake të FSK-së, që u mbajt në praninë e Bacit Rifat.
“Me disiplinë të hekurt dhe zemër të madhe, ushtarët tanë janë jo vetëm mburoja e shtetit, por edhe drita që ndriçon rrugën drejt paqes dhe sigurisë. Ata janë në pararojë të mbrojtjes së vlerave tona kombëtare, duke mishëruar shpirtin e çdo heroi që dha jetën për Kosovën”, ka shkruar Gërvalla.
Ajo ka thënë se kurdo dhe kudo që shteti ka nevojë, ushtarët tanë janë aty—të vendosur, të palëkundur dhe gjithmonë të gatshëm kur Kosova thërret. “Bijtë e bijat tona janë shpresa dhe garancia e një Kosove të lirë, të sigurtë dhe krenare”, ka theksuar Gërvalla.
Po ashtu, ajo ka nderuar figurën e Komandantit legjendar Adem Jashari, duke theksuar se emri i tij mbetet simbol i flijimit dhe guximit të pashoq. Gërvalla ka thënë se në Kazermën e Forcës së Sigurisë, e cila mban emrin e Jasharit, çdo hap jehon me kujtimet e sakrificës dhe lavdisë për Kosovën.
“Në këtë tokë të shenjtë, ku çdo pëllëmbë mban kujtimin e sakrificave sublime, emri i Adem Jasharit—simbol i flijimit dhe guximit të pashoq—jehon si një amanet për brezat e ardhshëm”, ka shkruar Gërvalla në “Facebook”.
