Në Ditën Ndërkombëtare të Gruas, misioni i udhëhequr nga NATO, KFOR përmes një postimit në “Facebook” tha se nderon forcën, përkushtimin dhe profesionalizmin e të gjitha grave “të jashtëzakonshme që shërbejnë në radhët tona dhe në mbarë Kosovën”.
KFOR tha se gratë në mision luajnë një rol jetik në ruajtjen e paqes, sigurisë dhe stabilitetit, duke siguruar një mjedis të sigurt për të gjitha komunitetet.
“Udhëheqja, këmbëngulja dhe përkushtimi i tyre na frymëzojnë çdo ditë. Sot, ne festojmë arritjet e tyre dhe riafirmojmë angazhimin tonë për barazinë gjinore, gjithëpërfshirje dhe fuqizimin brenda misionit tonë dhe më gjerë”.
KFOR-i përsëriti se vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si reagues të sigurisë.
