Mbrojtësi i Real Madridit, Dani Carvajal, do t’i nënshtrohet një operacioni pasi pësoi një dëmtim të ligamentit të kryqëzuar në fitoren 2-0 të së shtunës ndaj Villarrealit.
32-vjeçari u largua me barelë pas një dueli me mesfushorin e Villarrealit, Yeremy Pino.
“Dëmtimi i rëndë i ligamentit të kryqëzuar është konfirmuar. Do të më duhet të bëj një operacion dhe të jem jashtë fushës për disa muaj”, tha Carvajal në një njoftim në Instagram.
“Mezi pres të fillojë procesin e rikuperimit dhe të kthehem. Faleminderit të gjithëve për mesazhet tuaj”, shtoi ai.
Trajneri Carlo Ancelotti ishte i shqetësuar për dëmtimin e Carvajal, i cili është goditja e fundit për skuadrën spanjolle në vazhdën e lëndimeve.
Në këtë ndeshje, mbretërit luajtën pa portierin, Thibaut Courtois, i cili pësoi një dëmtim të muskujve në ndeshjen kundër Atletico-s fundjavën e kaluar.
