Një aksident tragjik ka ndodhur sot në aksin rrugor Domorovc-Hodonovc, në Ranillug, ku dy vajza të reja kanë humbur jetën. Sipas raportimeve, viktimat janë Arbnora Basha, e cila ndërroi jetë në vendngjarje, dhe Antiana Thaqi, e cila ndërroi jetë më vonë në spital.
Fillimisht u raportua se bëhej fjalë për një vetaksident, por hetimet e mëvonshme kanë ngritur dyshime se në aksident ishte i përfshirë edhe një kamion. Sipas Policisë, drejtuesi i kamionit dyshohet se, gjatë një kthimi të pasigurt, ka penguar lëvizjen e automjetit ku ndodheshin viktimat, duke shkaktuar humbjen e kontrollit dhe rrokullisjen e automjetit jashtë rrugës.
Drejtuesi i kamionit, një burrë kosovar i lindur në vitin 1970, është arrestuar dhe ndodhet në ndalim policor për 48 orë me vendim të Prokurorit të Shtetit, ndërsa hetimet për rrethanat e aksidentit po vazhdojnë.
Kjo ngjarje ka tronditur komunitetin lokal, ndërsa familjet e viktimave po përballen me një humbje të madhe.
