Autoritetet turke kanë arrestuar disa gazetarë në shtëpitë e tyre, tha të hënën një sindikatë e punonjësve të medias.
Këto arrestime po ndodhin mes përshkallëzimit të protestave të shkaktuara nga burgimi i Ekrem İmamoğlu, kryebashkiakut të Stambollit dhe rivalit kryesor të presidentit Rexhep Tajip Erdogan.
Sindikata Disk-Basin-Is tha se të paktën tetë gazetarë dhe fotoreporterë u arrestuan në atë që tha se ishte një “sulm ndaj lirisë së shtypit dhe të drejtës së njerëzve për të mësuar të vërtetën”.
“Nuk mund ta fshehësh të vërtetën duke i mbyllur gojën gazetarëve!”, shkroi sindikata në platformën e rrjeteve sociale X, ndërsa bëri thirrje për lirimin e menjëhershëm të tyre.
Që kur u bë president në vitin 2014, Erdogan ka synuar vazhdimisht gazetarët.
“Reporterët pa Kufij” njoftoi se vitin e kaluar gjatë dekadës së Erdoganit në pushtet, 77 gazetarë janë dënuar për “fyerje të presidentit”, ndërsa pesë janë vrarë. Të paktën 85% e medias kombëtare kontrollohet nga qeveria.
Arrestimi i İmamoğlu – një anëtar i Partisë Popullore Republikane (CHP) dhe padyshim figura më popullore në mesin e opozitës – shihet gjerësisht si një lëvizje politike për të hequr një sfidues të madh të Erdoganit nga gara e ardhshme presidenciale në 2028.
İmamoğlu u arrestua të mërkurën, duke shkaktuar valën më të madhe të demonstratave në rrugë në Turqi në më shumë se një dekadë, duke thelluar shqetësimet mbi demokracinë dhe sundimin e ligjit.
Të dielën, një gjykatë e arrestoi zyrtarisht İmamoğlun dhe e urdhëroi atë të burgoset në pritje të një gjyqi për akuzat për korrupsion.
İmamoğlu u burgos me dyshimin për drejtimin e një organizate kriminale, marrjen e ryshfetit, zhvatjen, regjistrimin e paligjshëm të të dhënave personale dhe manipulimin e ofertave – akuza që ai i ka mohuar.
Kërkesa për burgosjen e tij për akuza të lidhura me terrorin u refuzua edhe pse ai ende përballet me ndjekjen penale.
Zyrtarët e qeverisë hedhin poshtë me forcë akuzat se arrestimi i İmamoğlu është i motivuar politikisht, duke këmbëngulur që gjykatat e Turqisë të funksionojnë të pavarura.
Ministria e Brendshme njoftoi se İmamoğlu ishte pezulluar nga detyra si një “masë e përkohshme”.
İmamoğlu u zgjodh kryebashkiak i Stambollit në mars 2019, në një goditje të madhe ndaj Partisë për Drejtësi dhe Zhvillim të Erdoganit, e cila kishte kontrolluar qytetin për një çerek shekulli.
Partia e Erdoganit bëri presion për të anuluar rezultatet e zgjedhjeve komunale në qytetin prej 16 milionë banorësh, duke pretenduar për parregullsi.
Sfida rezultoi në një përsëritje të zgjedhjeve disa muaj më vonë, të cilat İmamoğlu i fitoi gjithashtu, këtë herë me një diferencë shumë më të madhe – duke e rritur epërsinë e tij nga 14,000 vota në më shumë se 800,000.
