Situata në Gaza po vazhdon të përkeqësohet, derisa një angazhim ndërkombëtar për ta ndalur luftën nuk duket askund në sipërfaqe.
Në këtë vend po ndodh edhe një krizë e madhe humanitare pasi Izraeli ka tri javë që nuk po lejon futjen e ushqimeve dhe medikamenteve.
Kreu i UNRWA, agjencia e OKB-së për refugjatët palestinezë, Philippe Lazzarini, vuri në dukje se “kjo është periudha më e gjatë që Gaza ka qenë pa asnjë furnizim që nga fillimi i luftës”.
Gjatë armëpushimit, shtoi ai, deri në 600 kamionë hynë në territor në baza ditore.
“Prindërit nuk mund të gjejnë ushqim për fëmijët e tyre. Të sëmurët janë pa ilaçe. Çmimet po rriten. Uria po rritet ndërkohë që rreziku i përhapjes së sëmundjeve është i afërt. Ndërkohë, bombardimet nga forcat izraelite vazhdojnë”, shkroi Lazzarini.
Nga ana tjetër, Donald Trump ka tërhequr nominimin e kongresmenes republikane Elise Stefanik për ambasadore në OKB.
Stefanik luajti një rol kyç në seancat dëgjimore të Kongresit mbi antisemitizmin e supozuar në kampuset e SHBA. Një avokate e vendosur pro-izraelite, gjatë seancave të konfirmimit të saj, ajo kishte shprehur besimin se Izraeli ka një të drejtë “biblike” mbi Bregun Perëndimor të pushtuar.
Trump e tërhoqi nominimin e saj, duke përmendur shqetësimet për margjinat e ngushta të republikanëve të Dhomës së Përfaqësuesve që pengojnë agjendën e tij legjislative. Stefanik ka qenë prej kohësh një nga mbrojtësit më të zjarrtë të presidentit në Kongres.
