Kina ka paralajmëruar kundërmasa ndaj tarifave të vendosura nga Donald Trump.
Aktualisht flitet se ato do të shkojnë në 125% dhe kjo nuk do të jetë lëvizja e vetme kineze për të kundërshtuar veprimet e administratës amerikane.
“Rritja e përsëritur e tarifave nga Uashingtoni “do të bëhet një shaka në historinë e ekonomisë botërore”, tha një zëdhënës i Ministrisë së Financave kineze në një deklaratë duke njoftuar për tarifat e reja.
Ministria e Tregtisë e Kinës tha se do të ngrejë një tjetër padi në Organizatën Botërore të Tregtisë kundër tarifave amerikane, të cilat do të fillojnë të shtunën.
Tarifat kineze do të prekin mallrat si kokrrat e sojës, avionët dhe pjesët e tyre, dhe ilaçet, të gjitha janë ndër importet kryesore të vendit nga SHBA.
Pekini, ndërkohë, pezulloi importet e melekuqes, shpendëve dhe miellit të kockave nga disa kompani amerikane javën e kaluar dhe vendosi më shumë kontrolle të eksportit për mineralet e rralla të tokës, kritike për teknologji të ndryshme.
Ndërkohë, importet kryesore të Shteteve të Bashkuara nga Kina përfshijnë elektronikë, si kompjuterë dhe celularë, si dhe pajisje industriale dhe lodra.
Në këtë luftë tregtare është përfshirë edhe Tesla, e cila ka pezulluar marrjen e porosive të reja për automjetet e saj Model S dhe Model X, njoftoi.
Të dy modelet janë prodhuar në SHBA dhe importohen në Kinë. Porositë e reja për të dy modelet nuk ishin më të disponueshme në llogarinë e programit ËeChat mini të prodhuesit të automjeteve në Kinë.
Tarifat më të larta të SHBA-së rrisin ndjeshëm koston e shitjes me pakicë për konsumatorët kinezë, duke i bërë këto makina më të shtrenjta se ato të prodhuara në vend.
Prodhuesi amerikan i automobilave prodhon makina Model 3 dhe Model Y në fabrikën e saj në Shangai për shitje në vend dhe për eksport në tregje si Evropa, duke përbërë shumicën dërrmuese të shitjeve të saj.
Të dy modelet përbënin më pak 0.5 për qind të dërgesave të Tesla-s me më shumë se 657,000 automjete vitin e kaluar.
Rritja e konkurrencës nga BYD dhe prodhues të tjerë vendas ka goditur gjithashtu shitjet e automjeteve të Tesla në Kinë.
Komisioneri Evropian i Tregtisë, Maros Sefcovic do të udhëtojë në Uashington të dielën dhe do të zhvillojë bisedime me zyrtarët amerikanë të hënën për të arritur një marrëveshje tarifore, tha zëdhënësi i tregtisë i Komisionit Evropian, Olof Gill për radion RTE të Irlandës.
“Të gjitha opsionet janë në tavolinë nëse kjo nuk çon në një rezultat të mirë”, tha Gill, duke shtuar se nuk ishte plotësisht e qartë se çfarë kërkonin SHBA-ja nga BE-ja, por që pauza e tarifave nënkuptonte se të dy palët ishin “në një hapësirë të re ku ne mund të ishim në gjendje të shohim disa lëvizje përpara dhe njëfarë progresi real”.
I dërguari i lartë tregtar i Koresë së Jugut thotë se homologu i tij ka sinjalizuar një gatishmëri për të arritur një marrëveshje mbi tarifat dhe se Seuli do të negociojë në interesin më të mirë të vendit pavarësisht zgjedhjeve të afërta, njoftoi transmetuesi lokal KBS.
