Kuvendi i Republikës së Kosovës ka nisur seancën konstituive, duke shënuar formalisht nisjen e legjislaturës së nëntë pas zgjedhjeve të parakohshme parlamentare të mbajtura më 9 shkurt.
Seancën është duke e udhëhequr deputeti më i vjetër i Kuvendit, Avni Dehari, dhe deputetja më e re, Sala Jashari.
Me të nisur seanca, kryesuesi Avni Dehari ka bërë thirrje për formimin e Komisionit për verifikim e mandateve. Ky komision mori mbështetjen e të gjithë deputetëve të pranishëm, gjithsej 119.
Lëvizja Vetëvendosje ka propozuar Artan Abrashin. Partia Demokratike ka propozuar deputetin Përparim Gruda. Lidhja Demokratike e ka propozuar Armend Zemajn. Lista Serbe e ka propozuar Branisllav Nikoliqin. Koalicioni AAK-Nisma ka propozuar Time Kadrijajn. Komunitetet kanë secila përfaqësues.
Pas formimit të Komisionit, Kuvendi ka hyrë në pauzë 15-minutëshe.
