EDICIONI I MËNGJESIT – STORM
Bota i jep lamtumirën Papës Françesku
Lajmi për vdekjen e Papës Françesku, në moshën 88-vjeçare, ka tronditur besimtarët e Kishës Katolike dhe më gjerë. Qindra persona të pikëlluar u mblodhën dje në Sheshin e Shën Pjetrit në Vatikan, teksa liderët botërorë reaguan menjëherë ndaj lajmit. Presidenti i Timorit Lindor, José Ramos-Horta, tha se ndarja nga jeta e Papës ishte “humbja më e madhe për njerëzimin në një kohë kur bota ka mungesë të udhëheqësve të mençur dhe të dhembshur.”
Sipas raportit zyrtar nga Vatikani, Papa ndërroi jetë si pasojë e një goditjeje cerebrale, e ndjekur nga komë dhe dështim i pakthyeshëm i sistemit kardiocirkulues. Ai vazhdoi aktivitetet e tij edhe një ditë para vdekjes, duke sfiduar këshillat e mjekëve për pushim.
Jason Horowitz, shef i zyrës së New York Times në Romë, e përshkroi Papën si “një papë surprizash”, i qëndrueshëm në temat që i kishte për zemër: migrantët, ambientin dhe pabarazinë.
Vatikani ende nuk ka shpallur datën e funeralit, por është bërë e ditur se homazhet publike mund të fillojnë që nesër. Ndërkohë, kardinalët nga e gjithë bota po nisen drejt Vatikanit për të organizuar ceremoninë e varrimit dhe për të përgatitur zgjedhjen e pasardhësit të tij.
Kush do ta pasojë? Ja disa nga kandidatët potencialë për Selinë e Shenjtë.
India mirëpret JD Vance
Në një vizitë katërditore në Indi, zëvendëspresidenti amerikan JD Vance u takua dje me Kryeministrin Narendra Modi. Vizita vjen në një moment kyç, teksa India po përpiqet të shmangë tarifat e reja të SHBA-ve ndaj eksporteve të saj. Para se Presidenti Trump t’i pezullonte përkohësisht tarifat reciproke këtë muaj, produktet indiane përballeshin me një taksë 27%.
Zyrtarë të lartë indianë dhe disa analistë e panë vizitën si shenjë të qartë se SHBA është ende e interesuar për një marrëveshje tregtare me Indinë.
Kina paralajmëroi se vendet që kufizojnë tregtinë me të për të afruar SHBA-të, do të përballen me masa hakmarrëse.
Kreu i sigurisë në Izrael akuzon Netanyahun për shpërdorim detyre
Ronen Bar, kreu i Shërbimit të Sigurisë së Brendshme të Izraelit (Shin Bet), deklaroi se Kryeministri Benjamin Netanyahu i kishte kërkuar që të përgjonte qytetarë izraelitë që kishin organizuar apo financuar protesta kundër qeverisë. Ai shtoi se Netanyahu i kishte kërkuar besnikëri personale, përtej vendimeve të Gjykatës Supreme, në rast të një krize kushtetuese.
LAJME TË TJERA NË SHKURT
-
Siri: Pas 13 vitesh lufte civile, qyteti antik i Palmirës qëndron ende në këmbë, ndonëse i dëmtuar rëndë.
-
SHBA: Departamenti i Drejtësisë kërkon shpërbërjen e Google për abuzim me dominimin në tregun e kërkimit online.
-
Jemen: Një sulm ajror amerikan goditi një zonë të populluar në Sana, duke vrarë 12 dhe plagosur 30 persona.
-
Kanada: Pas bllokimit të mediave nga Meta, hapësirat e dezinformimit u shtuan ndjeshëm.
-
Tajlandë: Arrestohet një zyrtar kinez i lidhur me ndërtimin që u shemb gjatë tërmetit të muajit të kaluar në Bangkok.
-
Koreja e Jugut: Policia është në kërkim të një burri që dyshohet se ka djegur një ndërtesë, duke shkaktuar një viktimë.
-
SHBA: Trump mohon shqetësimet rreth publikimit të planeve ushtarake nga Sekretari i Mbrojtjes Pete Hegseth, duke e quajtur “humbje kohe”.
-
Korrupsion: Gruaja e ish-senatorit amerikan Robert Menendez u shpall fajtore për përfshirje në një skemë ryshfeti që përfshinte ar, para dhe një Mercedes-Benz.
-
Teknologji: Kompania CATL lajmëroi për arritje të reja që mund të bëjnë automjetet elektrike më konkurruese.
-
Aviacion: Pasagjerët u evakuuan nga një aeroplan i Delta në aeroportin e Orlandos pasi fluturakja mori flakë në pistë.
Dita e Tokës – Si të bëjmë një ndryshim?
Sot shënohet Dita Ndërkombëtare e Tokës, dhe ekspertët e klimës japin disa këshilla për të qenë qytetarë të përgjegjshëm ndaj planetit.
Sipas tyre, një nga gjërat më të fuqishme që mund të bëni është… ajo që vendosni në pjatën tuaj.
