Donald Trump dhe Volodymyr Zelensky u takuan shkurtimisht të shtunën në Romë, në margjinat e funeralit të Papa Françeskut, në përballjen e tyre të parë që nga përplasjet në Shtëpinë e Bardhë. Takimi, që Shtëpia e Bardhë e cilësoi “shumë produktiv”, ndodhi teksa Trump po shtyn Ukrainën drejt një marrëveshjeje paqeje me Rusinë.
Të dy liderët, të shoqëruar nga bashkëshortet e tyre, u panë të ulur në rreshtin e parë në Sheshin e Shën Pjetrit, por pa kontakt publik mes tyre. Zëdhënësi i Zelenskyt konfirmoi takimin, pa dhënë detaje të tjera.
Tensionet mes tyre mbeten të larta pas kritikave të Trump dhe nënpresidentit JD Vance ndaj Zelenskyt më 28 shkurt, duke e akuzuar për mosmirënjohje ndaj ndihmës ushtarake amerikane. Trump ka kërkuar që Zelensky të pranojë kompromiset, përfshirë njohjen e Krimesë si pjesë e Rusisë – kërkesë që Kievi e ka refuzuar.
Në prag të funeralit, Trump deklaroi se palët janë “shumë afër” një marrëveshjeje dhe kërkoi takim të nivelit të lartë për ta finalizuar atë, duke paralajmëruar se mund të tërhiqet nga përpjekjet për paqe nëse nuk sheh progres.
