Kafja është një nga pijet e nxehta më të adhuruara në shumë vende të botës.
Pa konsumin e saj nuk niset mëngjesi për shumë persona.
Po me aq rëndësi për shumkë është edhe çaji, i cili në shumicën e rasteve konsumohet gjatë ditës apo në mbrëmje.
Një studim i fundit ka zbuluar se këto dy pije që janë shumë të përdorura edhe tek shqiptarët, mund të na ndihmojnë të menaxhojmë shëndetin e zemrës.
Studiuesit e Universitetit Sapienza të Romës u kërkuan 31 pjesëmarrësve që vuanin nga sëmundja e quajtur lupus, që t’u përgjigjen pyetësorëve.
Lupusi është një sëmundje inflamatore reumatizmale, si artriti reumatoid. Kjo sëmundje mund të ndikojë në rritjen e rrezikut të goditjes në tru dhe sëmundjeve të zemrës.
Shkencëtarët mendojnë se kafeina e gjetur në çaj dhe kafe mund të ndihmojë në zvogëlimin e këtyre rreziqeve.
Ata tashmë kanë nisur kërkimet e mëtejshme për të parë nëse me të vërtetë funksionon apo jo.
Sipas drejtueses së studimit, Dr Fulvia Ceccarelli, përveç efektit të mirënjohur stimulues në trup, kafeina ushtron edhe një efekt anti-inflamator sepse lidhet me receptorët e shprehur në sipërfaqen e qelizave imune.
Pas gjurmimit të konsumit të ushqimit dhe kafeinës së pjesëmarrësve në studim për një javë, ata morën gjakun e tyre për të parë sesi konsumimi i tyre ndikonte në shëndetin e tyre kardiovaskular.
Ata po kërkonin të shihnin se sa të shëndetshme ishin qelizat e tyre paraardhëse endoteliale (EPC). Këto janë qelizat përgjegjëse për riparimin dhe mirëmbajtjen e mureve të enëve të gjakut.
Studiuesit gjetën një lidhje pozitive midis marrjes së kafeinës dhe sasisë së EPC-ve që qarkullojnë nga një person.
Ekipi donte të mësonte më shumë për atë lidhje, kështu që ata morën qeliza EPC nga njerëzit pa lupus, i trajtuan këto qeliza me serum nga pacientët me lupus për të imituar efektet e sëmundjes dhe më pas shtuan kafeinë.
Ata zbuluan se kafeina ndihmoi në përmirësimin e formës së qelizave, rriti numrin e qelizave të shëndetshme dhe reduktoi numrin e qelizave që vdisnin.
Kafeina gjithashtu dukej se i ndihmonte qelizat të funksionojnë më mirë duke nxitur një proces të quajtur autofagji, që është mënyra se si qelizat pastrojnë pjesët e dëmtuara.
