Blue Ivy shpallet “nepo baby më i madh i të gjitha kohërave” pas performancës së saj në turin Cowboy Carter të Beyonce
Blue Ivy, vajza e talentuar 13-vjeçare e Beyoncé, u ngjit në skenë gjatë natës hapëse të turit Cowboy Carter – një tur që po përballet me shitje të dobëta biletash – për të treguar talentin e saj të shumëanshëm duke kërcyer në hitin “Deja Vu” të nënës së saj.
E veshur me një kostum prej lëkure ngjyrë maron, “fëmija prodigj” elektrizoi skenën në stadiumin SoFi përpara mijëra fansave. Ajo ngjante si pikë uji me nënën e saj, teksa shfaqte lëvizjet dhe qëndrimet ikonike të Beyoncé.
Performanca e saj shkaktoi një reagim të fuqishëm në rrjetet sociale, ku fansat u shprehën se Blue është një shembull pozitiv i nepotizmit në industrinë e muzikës.
“Nëse Blue Ivy këndon po aq mirë sa kërcen, më falni, por do ta mbështes me gjithë zemër këtë nepo baby,” shkroi një përdorues në X (ish-Twitter).
“Shumica e fëmijëve të të famshmëve nuk kanë as talent dhe as prezencë në skenë, por Blue Ivy është me të vërtetë një yll,” tha një tjetër.
“Tepër e impresionuar nga Blue Ivy. Jep ndjesinë e nepotizmit, por me talent,” shtoi një tjetër, ndërsa një i katërt shkroi: “Blue Ivy do të jetë nepo baby më i suksesshëm i brezit të saj, e di me siguri.”
Një tjetër përdorues shkroi: “Në moshën 13-vjeçare, Blue Ivy ka fituar çmim Grammy, ka performuar në shumicën e datave të turit Renaissance, në shfaqjen e mesit të ndeshjes së Super Bowl, dhe tani bën debutimin e saj në një tjetër tur botëror me Cowboy Carter. Ajo po dëshmon vazhdimisht se, ndonëse është një nepo baby, ka talent të vërtetë.”
Kjo pasoi pas performancës së saj krahas nënës në spektaklin gjigand të Super Bowl në Houston gjatë Krishtlindjeve, ku Blue e tejkaloi Beyoncé-n në lartësi ndërsa kërcyen bashkë. Ato ishin të koordinuara me veshje të bardha me temë western, ku Blue mori rolin e kërcimtares rezervë në këngën përmbyllëse “Texas Hold ‘Em”.
Beyoncé i bëri një përshëndetje të fshehtë vajzës së saj gjatë këngës, duke zëvendësuar fjalën “boy” me “Blue” në vargjet: “Then spin me in the middle, Blue, I can’t read your mind.”
Pas kësaj, Beyoncé dhe Blue kryen së bashku një kërcim tradicional të stilit amerikan, ndërsa lidhën krahët në një “do-si-do”.
Blue, që është mbajtëse e dy rekordeve të Guinness, ka fituar një Grammy, një MTV VMA Moon Man, një çmim NAACP Image, një Voice Arts Award dhe dy çmime BET – të gjitha para moshës 14 vjeçare.
Ajo më parë ka qenë kërcimtare rezervë në performancat e Beyoncé për këngët “My Power” dhe “Black Parade” gjatë turit të suksesshëm Renaissance, i cili gjeneroi 579.8 milionë dollarë nga 56 koncerte.
E reja e talentuar ka bashkëpunuar edhe me prindërit e saj të famshëm në disa këngë të suksesshme. Ajo debutoi muzikalisht në këngën “Glory” të Jay-Z në vitin 2012, duke u bërë personi më i ri në histori që është futur në listën Billboard.
Në vitin 2019, Blue ishte pjesë e këngës “Brown Skin Girl” të Beyoncé, e cila arriti vendin e 76 në Billboard Hot 100.
Vitin e kaluar, Blue debutoi si aktore zëri duke luajtur rolin e Kiara-s në filmin “Mufasa: The Lion King”.
“Nëse do t’i tregoja vetes sime të vogël se do të isha në një film, nuk do ta besoja kurrë,” tha ajo në një intervistë për Disney Studios.
“Është një eksperiencë e jashtëzakonshme dhe ndjej që të gjithë pjesëmarrësit janë shumë mbështetës dhe të dashur,” shtoi ajo. “Jam shumë e lumtur që vajzat që duken si unë kudo në botë mund ta shohin këtë film dhe të ndihen të përfaqësuara.”
Beyoncé hapi zyrtarisht turin Cowboy Carter të hënën mbrëma në SoFi Stadium në Los Angeles. Ajo do të performojë në SHBA dhe Europë, përpara se ta përmbyllë në Las Vegas më 26 korrik.
Megjithatë, për sa i përket shitjes së biletave, Beyoncé po përballet me vështirësi krahasuar me turnetë e saj të mëparshëm.
Më shumë se 3,000 vende ishin ende të lira në SoFi Stadium javën e kaluar, ndërsa edhe pak çaste përpara nisjes së koncertit, një numër i madh vendesh mbeteshin të pashitura, sipas hartës së vendeve në Ticketmaster.
Pas njoftimit për turin në shkurt, fansat u ankuan për çmimet marramendëse të biletave, të cilat varionin nga qindra në mijëra dollarë.
Por javën e kaluar, një fanse zbuloi bileta në rishitje për vetëm 20 dollarë në sektorin më të largët të stadiumit për koncertin në SoFi, një çmim që ajo e krahasoi me një menu të kufizuar të Big Mac nga McDonald’s, e cila kushtonte afërsisht po aq.
