Pakistani testoi një raketë balistike të shtunën, mes përshkallëzimit të tensioneve me Indinë pas sulmit vdekjeprurës të javës së kaluar ndaj turistëve në rajonin e kontestuar të Kashmirit.
Sipas ushtrisë pakistaneze, raketa tokë-tokë ka një rreze veprimi prej 450 kilometrash.
Lansimi i Sistemit të Armëve Abdali kishte për qëllim të siguronte “gatishmërinë operacionale të trupave dhe validimin e parametrave kryesorë teknikë”, duke përfshirë sistemin e përparuar të navigimit të raketës dhe manovrimin e përmirësuar, thuhet në një deklaratë nga ushtria.
Presidenti Asif Ali Zardari dhe kryeministri Shehbaz Sharif përgëzuan shkencëtarët, inxhinierët dhe të gjithë ata që u përfshinë në testin e suksesshëm.
Ministri i Informacionit, Attaullah Tarar, tha ditë më parë se Pakistani kishte “informacion të besueshëm” që sugjeronte se India po planifikonte një sulm të afërt.
Në një deklaratë, Tarar premtoi një përgjigje “shumë të fortë” nëse Pakistani sulmohet nga fqinji i tij i armatosur me armë bërthamore.
Të premten, Pakistani u bëri thirrje aleatëve të Gjirit që të ndihmojnë në uljen e tensioneve me Indinë pas sulmit të 22 prillit në Kashmirin e administruar nga India, në të cilin u vranë 26 persona – kryesisht hindu.
India ka akuzuar Pakistanin për orkestrimin e sulmit, një pretendim që Islamabadi e ka mohuar.
Rajoni i kontestuar i Kashmirit është i ndarë midis Indisë dhe Pakistanit, me të dy vendet që e pretendojnë atë plotësisht.
