Kryetari i Partisë Demokratike (PD), Sali Berisha, zhvilloi sot takimin përmbyllës të fushatës elektorale në qarkun e Vlorës.
Berisha tha se “11 maji si rrallë ndonjëherë në histori, është një ditë që ndan historinë”.
“Më 11 maj ne zgjedhim midis krahut të drejtë të historisë, anës së drejtë të historisë apo humnerës, apo boshatisjes masive të këtij vendi”, tha Berisha.
“Të zgjedhësh anën e drejtë të historisë do të thotë para së gjithash të zgjedhësh dinjitetin tënd si njeri”, shtoi Berisha.
Në fjalën e tij, Berisha tha se “me paratë e pensioneve, një grusht qeveritarësh ndërtuan parajsën e tyre”
“Sot ne kemi 760 mijë burra dhe gra, njerëz që kanë ndërtuar Vlorën dhe Shqipërinë, dhe që shumica dërrmuese e tyre numërojnë kafshatën. Nuk blejnë dot ilaçet. Nuk ulen dot në një kafene, por gjejnë stolat e ftohtë për të takuar një mik ose një shok. Por sepse me paratë e pensioneve të tyre, një grusht qeveritarësh ndërtuan parajsën e tyre. I vodhën ato”, tha Berisha.
Berisha tha më tej se “rruga Levan-Vlorë është rruga më e gjerë në territorin e Shqipërisë, është 35 metra e gjerë”, ndërsa shtoi se “rruga më e gjerë e Shqipërisë u ndërtua në vitin 2012 me 2.4 milionë euro”.
Sipas Berishës “rruga e Arbrit, e gjerë 10 apo 11 metra është ndërtuar me 11 milionë euro kilometrin”.
“Pse u ndala unë në këto hesape? Vetëm për t’u treguar pensionistëve se si u vodhën pensionet e tyre nga këta të pangopur, nga këta të pashpirt, që kur erdhi puna në janar solli buxhetin 8 miliardë dhe kapardisej se ishte buxheti më i madh në histori”, tha Berisha.
Berisha shtoi “të votosh anën e drejtë të historisë do të thotë të votosh dinjitetin tënd në radhë të parë. Dhe unë garantoj shqiptarët se pasuritë e tyre, se fondet e tyre do t’u kthehen para së gjithash atyre dhe vetëm atyre”.
