India dhe Pakistani thanë të shtunën se kishin rënë dakord për një armëpushim pas katër ditësh breshërish me dronë dhe sulmesh me raketa, luftimet më intensive midis rivalëve në dekada.
Por pati raportime gjatë natës për bombardime të vazhdueshme përgjatë kufirit.
Presidenti Trump njoftoi armëpushimin në faqen e tij në mediat sociale dhe tha se ai ishte ndërmjetësuar nga Shtetet e Bashkuara.
Zyrtarët indianë dhe pakistanezë konfirmuan armëpushimin, megjithëse vetëm Pakistani pranoi një rol amerikan.
“Falënderojmë Presidentin Trump për lidershipin dhe rolin e tij proaktiv për paqen në rajon”, tha kryeministri i Pakistanit, Shehbaz Sharif, në rrjetet sociale.
“Pakistani vlerëson Shtetet e Bashkuara për lehtësimin e këtij rezultati, të cilin e kemi pranuar në interes të paqes dhe stabilitetit rajonal”.
Megjithatë, ndërsa nata po afronte, kishte indikacione se armëpushimi nuk po respektohej plotësisht.
U raportuan të shtëna ndërkufitare në disa zona të pjesës indiane të Kashmirit, territorit të kontestuar në zemër të konfliktit midis Indisë dhe Pakistanit.
Surinder Kumar Choudhary, zyrtari i dytë më i lartë i zgjedhur në zonën e administruar nga India të Kashmirit, tha se kishte pasur të shtëna ndërkufitare.
Një zyrtar i lartë indian konfirmoi se kishte pasur edhe të shtëna përgjatë kufirit midis Indisë dhe Pakistanit.
Ai tha se dronë pakistanezë ishin shfaqur mbi Srinagar, kryeqytetin e pjesës së administruar nga India të Kashmirit, si dhe mbi shtetin indian të Punjabit.
Zyrtari tha se këto zhvillime ishin shkelje të marrëveshjes që kërkonte ndërprerjen e të gjitha aktiviteteve ushtarake.
Kriza aktuale filloi muajin e kaluar me një sulm vdekjeprurës nga militantët në Kashmirin e kontrolluar nga India.
India akuzoi Pakistanin për përfshirje në sulm; Pakistani e mohoi këtë pretendim.
Tensionet e larta u shndërruan në një përballje ushtarake të mërkurën kur India nisi sulme ajrore ndaj Pakistanit.
Në ditët që pasuan, pati raunde intensive luftimesh që përfshinin valë sulmesh me dronë dhe raketa.
Deri të shtunën në mëngjes, secili vend po godiste bazat ajrore të tjetrit.
