Në një njoftim të bërë publik përmes profilit të tij zyrtar në Facebook, Kryeministri i Shqipërisë, Edi Rama, ka ndarë një lajm të rëndësishëm dhe të shumëpritur për mijëra shqiptarë që jetojnë dhe punojnë në Itali. Marrëveshja për njohjen e ndërsjellë të kontributeve të sigurimeve shoqërore mes Shqipërisë dhe Italisë do të hyjë në fuqi më 1 qershor 2025.
Kjo marrëveshje e cila ka kaluar një proces të gjatë ligjor dhe burokratik, do të mundësojë që shqiptarët të përfitojnë pensione në përputhje me kontributet e tyre të paguara në Itali dhe anasjelltas, për qytetarët italianë që kanë punuar në Shqipëri.
Rreth 500 mijë shqiptarë dhe mijëra italianë pritet të përfitojnë nga kjo marrëveshje, e cila përbën një hap të rëndësishëm drejt përmirësimit të kushteve të jetesës dhe të drejtave sociale për komunitetin shqiptar në emigracion.
Kryeministri Rama vlerësoi kontributin e homologes së tij italiane në këtë proces dhe e cilësoi këtë zhvillim si një tregues të nivelit të ri të marrëdhënieve mes Shqipërisë dhe Italisë.
Marrëveshja pritet të sjellë lehtësira konkrete për qytetarët, të cilët do të mund të përfitojnë pensionet e tyre në mënyrë të drejtë dhe të sigurt, në përputhje me vitet e kontributit në secilin vend.
