Alarmin në fluturim: Kërcënim për bombë në avionin e Hawaiian Airlines!
San Diego, SHBA – Një ngjarje dramatike ka ndodhur të martën në mëngjes në aeroportin ndërkombëtar të San Diegos, kur një avion i madh i Hawaiian Airlines u detyrua të largohej urgjentisht nga pista vetëm pak çaste para ngritjes për shkak të një kërcënimi për bombë.
Fluturimi HA15, me destinacion Honolulu, ishte duke lëvizur në pistë rreth orës 08:30 me kohën lokale, kur një pasagjer i panjohur u dëgjua duke bërë një koment shqetësues për sigurinë e avionit. Mediat amerikane raportuan se bëhet fjalë për një kërcënim të drejtpërdrejtë për vendosje bombe.
Sipas deklaratës zyrtare të kompanisë ajrore, kapiteni mori menjëherë masat duke e drejtuar avionin Airbus A330 në një zonë të sigurt të aeroportit, ku u prit nga forca lokale dhe federale të rendit. Pasagjerët u evakuuan të gjithë në mënyrë të sigurt rreth orës 10:30, ndërsa avionin e rrethuan dhjetëra automjete policie dhe automjete të tjera emergjente.
Pamje të postuara në TikTok nga brenda avionit tregojnë forca policie të armatosura rëndë duke hyrë në bord, si dhe momentin kur një person nxirret nga avioni dhe të tjerët udhëhiqen drejt daljeve. Më pas, pasagjerët janë transportuar me autobus larg zonës së incidentit.
Në bordin e avionit ndodheshin 283 pasagjerë dhe 10 anëtarë të ekuipazhit. Hawaiian Airlines ka bërë të ditur se po punon që t’i transportojë sa më shpejt të jetë e mundur pasagjerët drejt destinacionit të tyre në Honolulu.
Zyrtarët e Aeroportit të San Diegos kanë konfirmuar se incidenti nuk ka ndikuar në fluturimet e tjera. Ndërkohë, hetimet mbi ngjarjen janë duke u zhvilluar nga autoritetet federale dhe Policia Portuale e San Diegos.
👉 Për më shumë detaje dhe pamje ekskluzive nga brenda avionit, ndiqni storm•!
