Irani dhe Shtetet e Bashkuara do të zhvillojnë rundin e pestë të bisedimeve mbi programin bërthamor të Teheranit, mes retorikës së pakompromis nga të dyja palët.
Ministri i Jashtëm i Iranit, Abbas Araghchi dhe i dërguari i Presidentit të SHBA-së, Donald Trump, për Lindjen e Mesme, Steve Witkoff, do të takohen të premten në Romë.
Bisedimet e vazhdueshme, të ndërmjetësuara nga Omani, synojnë një marrëveshje të re në të cilën Iranit do t’i ndalohet të prodhojë armë bërthamore, ndërkohë që do të lehtësohen sanksionet ndërkombëtare.
Megjithatë, deri më tani është bërë pak përparim dhe si Uashingtoni ashtu edhe Teherani kanë mbajtur një qëndrim të ashpër ditët e fundit, veçanërisht në lidhje me pasurimin e uraniumit nga Irani.
Witkoff ka thënë se Iranit nuk mund t’i lejohet të kryejë pasurim uraniumi.
Teherani, i cili e ka rritur pasurimin e uraniumit në rreth 60 përqind, shumë mbi nevojat civile, por nën 90 përqindëshin e nevojshëm për armatim, e ka hedhur poshtë atë “vijë të kuqe”.
Udhëheqësi Suprem, Ajatollah Ali Khamenei, e quajti kërkesën “të tepërt dhe të egër”, duke paralajmëruar se bisedimet në vazhdim nuk kanë gjasa të japin rezultate.
Reklamë
Sekretari i Shtetit i SHBA-së, Marco Rubio, tha të martën se Uashingtoni po punon për të arritur një marrëveshje që do t’i lejonte Iranit të ketë një program të energjisë bërthamore civile, por jo të pasurojë uranium, ndërsa pranoi se arritja e një marrëveshjeje të tillë “nuk do të jetë e lehtë”.
Të enjten, Departamenti i Shtetit njoftoi sanksione të reja mbi sektorin e ndërtimit të Iranit.
