Donald Trump e ka quajtur Vladimir Putinin “absolutisht të çmendur” pas një fundjave sulmesh të mëdha ajrore ruse në Ukrainë.
“Ai po vret pa nevojë shumë njerëz dhe nuk po flas vetëm për ushtarë. Raketa dhe dronë po qëllohen në qytete në Ukrainë, pa asnjë arsye”, shkroi Trump në Truth Social të dielën.
“Gjithmonë kam thënë se ai dëshiron TË GJITHË Ukrainën, jo vetëm një pjesë të saj, dhe ndoshta kjo po rezulton të jetë e saktë, por nëse e bën, kjo do të çojë në rënien e Rusisë!. Nuk e di çfarë dreqin i ka ndodhur Putinit. E njoh prej kohësh. Gjithmonë kam shkuar mirë me të. Por ai po dërgon raketa në qytete dhe po vret njerëz, dhe kjo nuk më pëlqen aspak”.
I pyetur nëse po shqyrtonte më shumë sanksione ndaj Rusisë, Trump tha: “Absolutisht”.
Edhe pse zemërimi i tij u drejtua kryesisht ndaj presidentit rus, Trump pati fjalë të ashpra edhe për Zelenskyn.
“Ai nuk po i bën asnjë nder vendit të tij duke folur në atë mënyrë. Çdo gjë që del nga goja e tij shkakton probleme, nuk më pëlqen, dhe më mirë të ndalet”, shtoi ai.
Të shtunën në mbrëmje, Rusia qëlloi 367 dronë dhe raketa drejt Ukrainës – sulmi i saj më i madh ajror ndaj Ukrainës që nga fillimi i pushtimit të saj në shkallë të plotë në vitin 2022.
Të paktën 12 persona u vranë.
