Një tjetër kërcënim shqetësues është drejtuar ndaj Presidentes së Kosovës, Vjosa Osmani. Storm ka siguruar ekskluzivisht mesazhin, ku raportohet për grupe të infiltruar nga Serbia, kontrabandë armësh dhe plane të dhunshme kundër autoriteteve kosovare.
Burimet konfirmojnë se mesazhi është dërguar përmes email-it në adresat zyrtare të Presidencës, duke ngritur alarmin për sigurinë kombëtare.
“Jan nis me t’vra k***, edhe shpihunat e serbis polici shka jan me arm kontrabandume”, thuhet në mesazhin kërcënues në adresë të Presidencës.
Policia dhe agjencitë e inteligjencës janë angazhuar për të hetuar rastin, ndërsa presidenca ende nuk ka bërë një prononcim zyrtar, teksa storm ka kontaktuar edhe Presidencën për të marrë një qëndrim zyrtar.
Presidentja e Kosovës, Vjosa Osmani, ka qenë objekt i disa kërcënimeve gjatë mandatit të saj, të cilat lidhen me vendimet e saj institucionale dhe qëndrimet ndaj çështjeve të ndjeshme politike e juridike në vend.
📌 Raste të dokumentuara të kërcënimeve ndaj Presidentes Osmani:
1. Kërcënime gjatë procesit të dekretimit të Kryeprokurorit të Shtetit (2023)
Në tetor 2023, Presidentja Osmani refuzoi të dekretojë kandidatin për Kryeprokuror të Shtetit, Blerim Isufaj, duke përmendur shkelje në procedurën e përzgjedhjes nga Këshilli Prokurorial i Kosovës. Ajo deklaroi se kishte marrë kërcënime për të dekretuar kandidatin, duke përfshirë mesazhe që paralajmëronin ngritje aktakuzash dhe presione të tjera.
2. Kërcënime ndaj Policisë së Kosovës nga struktura kriminale serbe (2023)
Në korrik 2023, Presidentja Osmani dënoi kërcënimet e drejtuara ndaj policëve të Kosovës nga Serbia dhe grupet e saj kriminale. Ajo theksoi se këto kërcënime janë pjesë e një fushate që synon destabilizimin e vendit dhe kërkoi që autorët të përballen me drejtësinë.
3. Kërcënime të mëparshme dhe presione politike
Në të kaluarën, Presidentja Osmani ka përballuar edhe presione dhe kërcënime të tjera, veçanërisht në kontekste të tensionuara politike dhe vendimmarrjesh të rëndësishme për vendin. Megjithatë, detaje specifike për këto raste nuk janë bërë gjithmonë publike.
