Nga sot, në orën 14:00, do të fillojë zbatimi i parimit të kontrollit hyrje-hyrje në pikëkalimin e përbashkët kufitar mes Kosovës dhe Maqedonisë së Veriut, në Glloboqicë-Jazhincë.
Siç njoftoi Ministria e Brendshme e Kosovës, kjo është njëra nga dy pikat e kalimit të përbashkët kufitar, e paraparë sipas protokollit të implementimit të marrëveshjes ndërmjet Qeverisë së Kosovës dhe asaj të Maqedonisë së Veriut, për pikat e përbashkëta të kalimit kufitar Hani i Elezit-Bllacë dhe Glloboqicë – Jazhincë, të nënshkruar në nëntor 2024 në mbledhjen e përbashkët të dy qeverive.
Regjimi i ri kufitar do të jetë sipas modelit ku kontrollet do të realizohen vetëm në hyrje nga policia respektive e shtetit, kurse policët do të punojnë në një objekt të përbashkët.
