Ka nisur gjykimi ndaj Momir Stojanoviq dhe 52 personave të tjerë të akuzuar si pjesëmarrës në Masakrën e Mejës.
Aktakuza për këtë rast është ngritur me 8 dhjetor 2023.
Të gjithë personat akuzohen në mungesë.
Avokati Arianit Koci, gjatë seancës ka thënë se i akuzuari Mihill Abazi ka vdekur qe një kohë të gjatë. Koci ka theksuar se këtë informacion ia ka dhënë djali i të akuzuarit, Sokoli, i cili është gjithashtu i akuzuar në këtë çështje.
Kjo masakër ndodhi në prill të vitit 1999, kur u vranë 370 shqiptarë të Kosovës, trupat e të cilëve u gjetën më pas në tetë varreza masive në Batajnicë të Serbisë.
Aktakuza, e ngritur në dhjetor të vitit 2023 dhe u plotësua në prill të vitit 2024, përfshin 53 persona, ndër të cilët i dyshuari kryesor është Momir Stojanoviq, ish-shef i Departamentit për Siguri në Komandën e Korpusit të Prishtinës, i cili ka qenë edhe drejtor i Agjencisë Ushtarake dhe të Sigurimit të Serbisë.
Në mesin e të akuzuarve janë edhe Franko Simatoviq “Frenki”, komandant i Njësisë për Operacione Speciale (JSO), e formuar nga Shërbimi i Sigurisë Shtetërore i Serbisë në fillim të viteve ’90; Sreten Çamoviq, ish-shef i Sigurisë; Verolub Zhivkoviq, ish-shef i Shtabit të Korpusit të Prishtinës; Illija Todorov, ish-komandant i Brigadës së 63-të Parashutiste, dhe Dragan Zhivanoviq, ish-komandant i Brigadës së 52-të Raketore të Artilerisë.
