Presidenti amerikan Donald Trump ka hedhur poshtë raportet e Wall Street Journal se ai miratoi planet e sulmit ndaj Iranit, por po e mban të fshehur urdhrin përfundimtar për momentin.
Ky medium kishte raportuar se Trump u tha ndihmësve të lartë se po pret të shohë nëse Teherani do të braktisë programin e tij bërthamor i pari.
“Wall Street Journal nuk ka ide se cilat janë mendimet e mia në lidhje me Iranin”, shkroi Trump në Truth Social.
Nga ana tjetër, Reuters ka raportuar se i dërguari special i SHBA-së, Steve Witkoff, ka folur disa herë në telefon me ministrin e jashtëm të Iranit që kur Izraeli filloi sulmet e tij ndaj Iranit javën e kaluar.
Sipas këtij mediumi, bisedimet janë pjesë e përpjekjeve për të gjetur një zgjidhje për t’i dhënë fund konfliktit dhe të rikthehen diskutimet më thelbësore të drejtpërdrejta midis SHBA-së dhe Iranit, të nisura që nga prilli.
Kryediplomati iranian, Abbas Araqchi raportohet se i ka thënë Witkoff-it se Teherani nuk do të kthehej në negociata nëse Izraeli nuk do të ndalonte sulmet e tij.
Diplomatët thanë gjithashtu se bisedimet përfshinin një diskutim të shkurtër të një propozimi të SHBA-së dhënë Iranit në fund të muajit të kaluar, me qëllim krijimin e një konsorciumi rajonal që do të pasuronte uraniumin jashtë Iranit – diçka që Teherani deri më tani e ka refuzuar.
