Pas takimit të së premtes me përfaqësuesit evropianë në Gjenevë, ministri i jashtëm i Iranit, Abbas Araghchi, ndodhet sot në Stamboll të Turqisë për të vazhduar bisedimet diplomatike.
Agjencia shtetërore e lajmeve Tasnim raporton se Araghchi mbërriti në Turqi këtë mëngjes për t’u takuar me përfaqësues nga e gjithë bota arabe dhe myslimane.
“Në këtë takim, me sugjerimin e Iranit, do të trajtohet konkretisht çështja e sulmit të regjimit sionist ndaj vendit tonë”, thotë Araghchi, sipas një raporti të Tasnim.
Ai u tha gazetarëve se vendi i tij “nuk mund të negociojë me SHBA-në kur populli ynë është nën bombardime”.
Ai pretendon se “SHBA-të kanë qenë të përfshira në agresion që nga dita e parë” , megjithëse nuk ofroi prova për këtë.
Araghchi paralajmëron se përfshirja e SHBA-së në konfliktin e vazhdueshëm midis Izraelit dhe Iranit do të ishte “shumë, shumë e rrezikshme”.
Ministri i Jashtëm iranian tha se është “absolutisht i gatshëm për një zgjidhje të negociuar për programin tonë bërthamor”.
“Diplomacia ka funksionuar në të kaluarën dhe mund të funksionojë përsëri në të ardhmen. Që të kthehemi te diplomacia, agresioni duhet të ndalet”.
Në zhvillimet në konflikt, Izraeli pretendon se ka vrarë një tjetër komandant iranian.
Ushtria izraelite thotë se avionët e saj luftarakë shënjestruan dhe vranë Behnam Shahriyarin, ndërsa ai po udhëtonte me makinë nëpër Iranin perëndimor gjatë natës.
Shahriyari ishte komandant në njësinë e transferimit të armëve të Forcës Quds, pjesë e Korpusit të Gardës Revolucionare Islamike, tha IDF.
Deri tash të paktën 430 persona janë vrarë dhe 3,500 të tjerë janë plagosur në Iran që nga fillimi i konfliktit më 13 qershor, raporton agjencia e lajmeve Nour, duke cituar ministrinë e shëndetësisë të Iranit.
Ky është përditësimi i parë zyrtar mbi numrin e të vdekurve në Iran prej disa ditësh.
Më parë, ministria e shëndetësisë e Iranit tha të dielën se të paktën 224 persona ishin vrarë, ndërsa një grup i të drejtave të njeriut, Agjencia e Lajmeve të Aktivistëve të të Drejtave të Njeriut, e tha të premten se numri jozyrtar i të vdekurve ishte 657.
Ushtria izraelite thotë se tetë dronë iranianë kanë fluturuar në hapësirën ajrore izraelite gjatë pak më shumë se një ore këtë mëngjes.
Midis orës 10:16 dhe 11:27 sipas orës lokale (08:16 dhe 09:27 BST), IDF thotë se ka identifikuar dronë iranianë në të gjithë vendin, nga Eliat në skajin jugor të Izraelit deri në rajonin verior që kufizohet me Sirinë.
