Presidenti amerikan Donald Trump ka thënë se bisedimet për t’i dhënë fund luftës në Gaza kanë “shkuar shumë mirë”.
Ai shprehu gjithashtu besim se Hamasi ishte i gatshëm t’i jepte fund luftës.
“Ata duan të takohen dhe duan të kenë atë armëpushim”, u tha ai gazetarëve.
Disa nga partnerët e koalicionit të linjës së ashpër të Netanyahut kundërshtojnë ndalimin e operacioneve ushtarake, por, meqë izraelitët janë bërë gjithnjë e më të lodhur nga lufta në Gaza, qeveria e tij pritet të mbështesë një armëpushim nëse ai mund të sigurojë kushte të pranueshme.
I pyetur për një zgjidhje me dy shtete që përfshin njohjen e një shteti të pavarur palestinez, Netanyahu tha se çdo shtet i ardhshëm palestinez do të ishte një platformë për të shkatërruar Izraelin.
“Pra, njerëzit nuk ka gjasa të thonë: Le t’u japim atyre një shtet tjetër dhe platformën për të shkatërruar Izraelin”, tha Netanyahu.
Ai tha gjithashtu se Izraeli do ta mbajë “gjithmonë” kontrollin e sigurisë mbi Gazën.
“Tani, njerëzit do të thonë se nuk është një shtet i plotë, nuk është një shtet. Nuk na intereson”, shtoi ai.
Udhëheqësi izraelit tha gjithashtu se po punonte “shumë ngushtë” me SHBA-në për të identifikuar vendet që do të ishin të gatshme të pranonin palestinezët e zhvendosur.
Në këtë takim, Netanyahu i dorëzoi Trump-it letrën për nominimin e këtij të fundit për të marrë çmimin Nobel për Paqe.
