Mesazhet nga biznesmenja Amanda Staveley pretendojnë se Princi i Kurorës Saudite “tërhoqi penjtë” prapa skenave të marrëveshjes së diskutueshme për Klubin e Futbollit “Newcastel United”.
storm•/Sport: Në WhatsApp mesazhet e zbuluara, të cilat janë parë nga gazeta “The Telegraph,” Mohammed bin Salman, Princi i Kurorës i Arabisë Saudite, akuzohet për kontrollin direkt të marrjes së Newcastle United nga fondi i pasurisë sovrane të shtetit të tij.
Mesazhet nga Amanda Staveley, ndërmjetësja që organizoi shitjen e klubit nga biznesmeni Mike Ashley tek Fondi i Investimeve Publike (PIF) i Arabisë Saudite, vënë në dyshim garancitë e dhëna për Premier League për të siguruar marrëveshjen.
Sipas mesazheve, Princi i Kurorës ishte personi që miratonte vendimet kyçe për këtë marrëveshje, dhe madje kishte shprehur pakënaqësinë e tij gjatë vonesave në negociata.
Në disa momente, Staveley shprehu shqetësim për humbjen e durimit të Princit të Kurorës dhe përpjekjet e guvernatorit të PIF për ta bindur atë që të mos tërhiqej nga marrëveshja.
Përfshirja politike dhe garancitë e tyre
Ky material i zbuluar ka hedhur dritë të re mbi përfshirjen e politikës në këtë proces. Mesazhet tregojnë se Staveley kërkoi ndihmën e ambasadorit saudit në Mbretërinë e Bashkuar për të shpëtuar marrëveshjen dhe kishte kontakte direkte me Lord Grimstone, atëherë ministrin për investime, për të ushtruar presion që marrëveshja të kalonte.
Premier League fillimisht kishte refuzuar shitjen e Newcastle United tek konsorciumi i udhëhequr nga fondi saudit, duke pasur frikë se klubi do të kontrollohej nga shteti i Arabisë Saudite.
Por, Premier League përfundimisht pranoi marrëveshjen pasi mori “garanci të detyrueshme ligjore” se PIF do të vepronte në mënyrë të pavarur nga shteti saudit.
Çka është kontroverse dhe pyetjet e së ardhmes
Megjithëse Staveley dhe PIF pretendojnë se ata kanë respektuar garancitë e dhëna për Premier League, mesazhet tregojnë se Princi i Kurorës vazhdonte të ishte i përfshirë në proces dhe kishte ndikim të drejtpërdrejtë në vendimet e rëndësishme.
Kjo situatë ka ngjallur shqetësime të reja për kontrollin e klubeve të Premier League nga shtete me rekorde të diskutueshme të të drejtave të njeriut dhe për ndikimin e tyre politik në futbollin anglez.
