Dy ekipet e mëdha, PSG dhe Chelsea do të përballen mbrëmjen e sotme në stadiumin ‘MetLife’ në New Jersey, në finalen e Kupës së Botës për Klube.
Skuadra franceze vjen në këtë përballje pas një fitoreje bindëse ndaj Real Madridit, e cila i ka rritur ndjeshëm besimin ekipit të drejtuar nga Luis Enrique.
Nga ana tjetër, Chelsea siguroi finalen pas fitores 2-0 ndaj Fluminense.
Parizienët marrin pjesë në këtë kompeticion si kampionë të Evropës, ndërsa londinezët si fitues të UEFA Conference League.
PSG ka pasur një ecuri mbresëlënëse këtë sezon, duke mposhtur disa nga klubet më të mëdha evropiane, Interin në finalen e Ligës së Kampionëve me rezultatin 5-0, Atletico Madridin me 4-0 dhe së fundmi Real Madridin me të njëjtin rezultat, 4-0.
Chelsea gjithashtu vjen me besim të plotë, pasi në 10 ndeshjet e fundit ka regjistruar 8 fitore dhe vetëm 2 humbje, një formë që e bën skuadrën e Enzo Marescas një kundërshtar serioz për francezët.
